४ गते यलय् आमसभा
जेठ ६ गते येँय् जुइगु नेवाः प्रदर्शन ताःलाकेगु ताःतुनां यलया महारानी हिति मंगलय् आमसभा याइगु जूगु दु । वइगु ४ गते बिहीवाः जुइगु उगु आमसभाय् डा. कृष्ण भट्टचन, मल्ल के. सुन्दर, राजेन्द्र श्रेष्ठ, डा. महेशमान श्रेष्ठ, जीतवीर लामा, हिमालधन राई, बाबुराजा बज्राचार्य, वदन शर्मा, शाक्य सुरेन, हिरारत्न शाक्य, ऋषिप्रसाद श्रेष्ठ, सुशिला शाक्यं न्ववाइगु जानकारी ग्वसाः खलकं बिउगु दु । आमसभा नेवाः राष्ट्रिय आन्दोलन, मांभाय् पुचः व मन्तुना मिसा खलःया ग्वसालय् जुइत्यंगु खः ।
बन्दय् यल मंकाः खलःया एक्यबद्धता
आदिवासी जनजाति संयुक्त संर्घष समितिं आव्हान याःगु जेठ ७, ८ व ९ गते बन्दया ज्याझवलय् नेपालभाषा मंकाः खलः यलं एक्यबद्धता क्यंगु दु । खलःपाखें छगू प्रेस विज्ञप्ति पितब्यूसें संविधान निर्माणया खँय् देय्या प्रमुख राजनीतिक दलया खस अहंकारवादी व ब्राम्हणवादी चिन्तन ज्वनाच्वंपिं नेतातय्सं जातीय पहिचान स्वनेगु विरोधय् चलखेल जुयाच्वंगु खँ न्ह्यथनातःगु दु । थुगु इलय् नेवाः लगायत सकल जनजातित छप्पं छधी जुयाः आन्दोलित जुइमाःगु खँ न्हृयथंसें आन्दोलनय् यल मंकाः खलकं एक्यबद्धता क्यंगु खः ।
