सहमति यायेत माओवादी व कांग्रेस सहमत
भावी संविधानया विवादित विषयसं बहुमत प्रक्रिया स्वयाः नं सहमतिया आधारय् निकास मालेत एकीकृत नेकपा माओवादी व नेपाली काङ्ग्रेस सहमत जूगु दु ।
माओवादी नायः पुष्पकमल दाहालया निवास लाजिम्पाटय् जूगु माओवादी व काङ्ग्रेसया शीर्ष नेतात दथुइया सहलहसं फयांफत्तले सहमतिपाखें हे बिबादित बिषयसं समाधान मालेगु सहमति जूगु खः ।
सहमतिया बिषयसं माओवादी व काङ्ग्रेसं नेकपा एमालेलिसे नं सहलह याइगु जूगु दु । सहलहसं बहुमत प्रक्रियाय् वनेबलय् झन् अप्वः विवाद व दलत दथुयया दूरी अप्वइगु खँय् निगुलिं दल सकारात्मक जूगु काङ्ग्रेस संसदीय दलया नेता रामचन्द्र पौडेलं जानकारी बियादीगु दु ।
सहलहसं माओवादी व कांग्रेसया शीर्ष नेतातय्गु ब्वति दुगु खः । संविधानया विवादित विषय, राज्य पुनर्संरचना, उकिया नामाकरण व ल्याः बारे आपालं विवाद जुयाच्वंगु इलय् माओवादी व काङ्ग्रेस दथुइ सहलह जूगु खः ।
हात्तीबन रिसोर्टय् न्ह्यगू राज्यतक्क दयेके फइगु सहमति याःगु मधेसी मोर्चा व मू स्वंगू दलया शीर्ष नेतात दथुइ सहमति जूसां नं उगु हे दलया जनजाति व मधेसी सभासद्ं झिंप्यंगू प्रदेशय् मतदान यायेगु न्ह्यःथना मोर्चाबन्दी यायेवं दलया शीर्ष नेतात हथाय् चाःगु दु ।
जातीय म्हसीकालिसेया झिंप्यंगू प्रदेशय् समर्थन यायेगु न्ह्यःथना जनजाति सभासद्तय्गु मोर्चाबन्दीलिपा नेतातय्सं न्ह्यात्थे यानाः नं सहमति यायेमाःगु खँय् बहः ब्यूगु दु ।
