थापाथलीया बागमती खुसिसिथय्या सुकुम्वासी वस्ती चीकल

अधिकार सम्पन्न एकीकृत वागमती सभ्यता समितिं थापाथलीस्थित वाग्मती खुसिया सिथय् च्वंगु सुकुम्वासी बस्ती चीकूगु दु । थौं सुथंनिसें प्रहरीं वस्ती चीकेगु शुरू याःगु खः ।

बस्ती चीकेगु झ्वलय् सुकुम्वासीतय्सं पंगः थनेवं छुं ई प्रहरीनाप ल्वापू तकं जूगु खः । ल्वापुइ सुकुम्वासीतय्सं अप्पां कयेकेवं प्रहरीं बागू दर्जन अश्रु ग्याँस तकं त्वतूगु खः । उगु झ्वलय् झिंनिम्ह सुकुम्वासी घाःपाः जूगु दु । अथेहे यक्वःसित नियन्त्रणय् काःगु दु । प्रहरी व सुकुम्वासी दथुइया ल्वापूया हुनिं थापाथली क्षेत्र छुं ई तनवग्रस्त जूगु खः । उगु क्षेय् सलंसः प्रहरी परिचालन याःगु खः ।

सच्छि व चय्खा छेँ टहरा दुगु थापाथलीया सुकुम्वासी बस्ती चीकेत सरकार तःक्वः हे ई बिइधुंकूगु व छेँखापतिंयात झिंन्याद्वः झिंन्याद्वः तका नं ब्यूगु खः । अथेखःसां उगु बस्ती खाली मजुइवं थौं सुथय् प्रहरी परिचालन याना बस्ती चीकेगु ज्या याःगु खः । बस्ती खाली यायेगु झ्वलय् न्यागः डोजर छ्यःगु खः । अटेर जुयाच्वंपिं सुकुम्वासीतय्त प्रहरीं थौं सुथय् सुचं बिया खाली यायेत धाःगुलिइ अटेर यायेवं डोजर चलेयाःगु खः ।

News Location: