भ्वँतय् कर्फ्यु
माओवादी भातृ संगठनं याःगु तामसालिङ बन्दया झ्वलय् भ्वँतय् बन्दकर्ता व स्थानीयबासीतय् दथुइ ल्वापू तच्वयेवं स्थानिय प्रशासनं आ न्हिनय्या निताः ईलं निसे अनिश्चितका तक कर्फ्युया घोषणा याःगु दु । स्थानिय प्रसासनं साँगा निसे नीच्याःगु किलोमिटर(काठमाडौं विश्वविद्यालय) तक कर्फ्यु तयाब्यूगु दु ।
राष्ट्रपतिया पलाःया भिंकेमाःगु व संकल्प प्रस्ताव बारे संसदय् सहलह मयाकूगु विरुद्ध आन्दोलन यानाच्वंगु माओवादीं थौं ताम्सालिङ राज्य समिति दुने लाःगु झिगू जिल्ला बन्द याःगु खः । माओवादीया भातृ संगठन तमाङ मुक्ति मोर्चाया आह्वानय् थुगु बन्द जूगु खः । सरकार व मोर्चा दथुइ जूगु नीनिगू बुँदे सम्झौता न कार्यन्वयन यायेमाःगु माग नं दुथ्याकाः मोर्चां थौया बन्द आह्वान याःगु खः ।
बन्दया झ्वलय् भ्वँतय् च्वंगु माओवादी पार्टी ज्याकूथी तोडफोड लिपाः स्थानिय प्रशासनं भ्वँतय् निन्हय् नितः ईलं निसें अनिश्चितकाल तक कर्फ्यु तःगु खः । थ्वस्वयां न्ह्यः बन्दकर्ता व स्थानीयबासीत दथुइ जूगु ल्वापूयात नियन्त्रणतय् कायेत प्रहरीं नीन्याःगु राउन्ड अश्रुग्यास व खुगू राउण्ड हवाइ फायर याःगु खः ।
बन्दया उल्लंघन याःगु धासें येँय् नं वयाच्वंगु खुगः बस व स्थानीयबासीतय् मोटरसाइकलयात भ्वँतय् बन्दकर्तातय्सं तोडफोड याःगु खः । मोटरसाइकल व बसय् तोडफोड लिपाः आक्रोशित स्थानियबासीतय्सं भ्वँतय् च्वंगु माओवादीया ज्याकूथी अप्पां कायेकाः तोडफोड सुरु यायेवं अन तनाव जूगु खः ।
