एमालेयात त्वता प्रधानमन्त्री भट्टराईं १२म्ह मन्त्रीतय्गु मन्त्रीपरिषद् गठन
न्यागू बुँदे सहमित कथं प्रधानमन्त्री डा. बाबुराम भट्टराईं माओवादी, कांग्रेस व लोकतान्त्रिक मधेसी मोर्चायात कःघाना झिंनिम्ह दुजः दुगु मन्त्रीपरिषद् गठन यानादीगु । गुकिइ न्हापांगु चरण कथं माओवादी व मधेसी मोर्चापाखें न्याम्ह न्याम्ह मन्त्री नियुक्ति याःगु दुसा कांग्रेसपाखें धाःसा निम्हेसित जक सरकारय् दुथ्याकूगु दु । थौं विस्तार याःगु झिंनिम्ह मन्त्रीतय्त शनिवाः बहनी हे शितल निवासय् राष्ट्रपति डा.रामवरण यादवया उपस्थितिइ प्रधानमन्त्री डा. भट्टराईं सपथ बियादीगु खः ।
सपथ काःपिं मन्त्रीत माओवादी पाखें नारायणकाजी श्रेष्ठ, पोष्टबहादुर बोगटी, बर्षमान पुन, टोपबहादुर रायमाझी व दीनानाथ शर्मा खः ।
अथेहे नेपाली कांग्रेस पाखें महामन्त्री कृष्णप्रसाद सिटौला व सूर्यमान गुरुङ निम्हेसिनं जक काःगु दु । थौं नियुक्ति याःपिं माओवादी व कांग्रेसया मन्त्रीतय्गु मन्त्रालय धाःसा क्वःमछ्यूनि ।
अथेहे मधेसी मोर्चापाखें विजयकुृमार गच्छदारयात गृह, हृदयश त्रिपाठीयात भौतिक योजना व निर्माण, राजकिशोर यादवयात संचार, महेन्द्र यादवयात सिंचाई मन्त्रीकथं सपथ ब्यूगु खःसा स्वास्थ्य मन्त्री नियुक्त जूम्ह राजेन्द्र महतो स्वनिगलय् मदुगुलिं वय्कःयात लिपा जक सपथ बिइगु धाःगु दु ।
थुखे नेकपा एमालें धाःसा गृहया माग याना आन्तरिक सहलह लिपा जक सरकारय् वनीपिं नेतातय्गु नां सिफारिस यायेगु धाःगु दु ।
News Location:
