सेती खुसिइ वःगु खुसिबालं १४म्ह सित, यक्वः हे तनाच्वन

माछापुच्छ्रे हिमालय् वःगु हिपचलखं सेती खुसिया मुहान तज्यायेवं खुसिवा वया म्होतिं झिंप्यम्ह सीगु दुसा न्यय्म्ह स्वयां अप्वः तनाच्वंगु दु । यक्वः हे ल्याखय् धनमाल क्षति जूगु धाःगु दु ।

हेलिकप्टरं स्थलगत निरिक्षण याःगु सुरक्षा अधिकारीतयेगु टोलीं पत्रकार सम्मेलन याना उगु क्षेत्रया बारे जानकारी ब्यूगु खः । उगु क्षेत्रय् थ्यंकादीम्ह नेपाल प्रहरीया डिआइजी राजेन्द्रसिंह भण्डारीं ब्यूगु जानकारी कथं हिमचलखं प्वाःत्यूगु सेती खुसिया मुहान तःधंगु ताल जूगु व आकाझाकां थौं सुथय् थ्यंमथ्यं गुता इलय् तज्याना खुसिवा वःगु खः ।

स्थानिय प्रशासनया कथं सेती खुसिइ खुसिवा वया सीपिं झिंप्यम्हेसिया सीम्ह लुगु दु । इमिगु सीम्ह क्षतविक्षत जूगु अवस्थाय् लखय् लय्पुयाच्वंगु अवस्थाय् लुइकूगु खः । खुसिवा वया यक्वः हे मनूत तनाच्वंगु अनुमान याःगु दु । गुकियाना तनाच्वंपिनिगु ल्याःयकिन यायेफयाच्वंगु मदुनि ।

खुसिबा वया खारापानी बजाः पूर्णरुपं चुइकुगु दु । आ उगु बजारय् चाया भ्याटना जक दुगु व उगु हे वस्तीया मनूत तनाच्वंगु धाःगु दु । सेती खुसिइ चुइकूपिं स्वम्हेसित धाःसा म्वाःम्वाकं उद्धार यायेत ताःलाःगु दु । इमिगु मणिपाल शिक्षण अस्पतालय् वासः जुयाच्वंगु दु । खुसिया स्वरुप धाःसा आः बहनी वया थःगु हे अवस्थाय् वःगु धाःगु दु । तर नं उगु क्षेत्रय् चलः वनेगु व खुसिबा वयेफुगु सम्भावना धाःसा दया हे च्वंगु धाःगु दु ।

सेती खुसिइ खुसिबा वयेत्यंगु जानकारी धाःसा पोखराया बासिन्दां भचा न्ह्यः हे स्यूगुलिं यक्वः मनूत सुरक्षित थासय् वनेत ताःलाःगु खः । पोखरा विमानस्थलया बरिष्ठ अधिकृत अनुप जोशीं पोखरा वयाच्वंगु जहाजं माछापुच्छ्रे हिमालया फेदीं हिमचल वया सेती खुसिइ खुसिबा वःगु खबर याःगु खः । वयां लिपा विमानस्थल ज्याकुथिं संचारमाध्यमयात जानकारी बिइवं थुकिया प्रचारप्रसार जूगु खः ।

News Location: