धर्माचार्यया १११ गू बुदिं हन
नेपालभाषाया न्हापांम्ह पत्रकार नापं नेपालभाषाया पुनरोत्थानय् सशक्त भूमिका म्हितादीम्ह धर्मादित्य धर्माचार्यया सच्छि व झिंछक्वःगु बुदिं शनिवाः छगू ज्याझ्वःया दथुइ हन ।
मां भाय् पुचः यलया ग्वसालय् जूगु उगु ज्याझ्वलय् यलया पूच्वय् च्वंगु धर्मादित्य धर्माचार्याया झ्वाताय् स्वांमा क्वखायेकेगु ज्या जूगु खः । उगु ज्याझ्वलय् धर्मादित्य धर्माचार्य सिरपाः कमिटीया दुजः नापं पुचःया सल्लाहकार जुलुमलाल चित्रकार, नेपालभाषा मंकाः खलः यलया नायः किरण शाक्य, धर्मादित्य धर्माचार्यया काय् धर्ममान नेवाः, भाषा सेवी शाक्य सुरेन, पुचःया सल्लाहकार शान्तराज शाक्य, सिने पत्रकार विजयरत्न असंबरे लिसेंया आपालं भाषाह्यःमिपिन्सं धर्माचार्यया झ्वाताय् स्वां देछायेगु ज्या जूगु खः ।
पुचःया नायः विजय शाक्यं न्ह्याकादीगु उगु ज्याझ्वलय् आपालं भाषिक कार्यकर्तापिनिगु उपस्थिति दुगु खः । पुचःपाखें दय्दसं धर्माचार्यया बुदिं हनावयाच्वंगु खः ।
ने.सं. १०२२ बछलाथ्व १४ अर्थात थौंया दिनस जन्म जूम्ह धर्मादित्य धर्माचार्यं "बुद्ध धर्म" पत्रिका पिथनादीगु खःसा तत्कालिन ल्याय्म्हतय्गु सल्लाह व ईया माग कथं ने.सं. १०४७ य् थुगु पत्रिकाया नां "बुद्ध धर्म व नेपालभाषा" छूगु खः ।
