माओवादीं प्रकाश व बोगटीयात सरकारय् छ्वइगु
एकीकृत नेकपा (माओवादीं) न्वकू नारायणकाजी श्रेष्ठ 'प्रकाश' व छ्यान्जे पोष्ट बहादुर बोगटीयात सरकारय् छ्वइगु जूगु दु । माओवादी स्थायी समिति दुजःतयगु अनौपचारिक मुँज्यां न्वकू प्रकाश व छयान्जे बोगटीयात छ्वयेगु क्वःछिउगु खः ।
प्रकाश माओवादी मधेसी मोर्चाया मंकाः सरकारय् उप प्रधान नापं परराष्ट्र व बोगटी उर्जामन्त्री जुयादीगु खः ।श्रोतया कथं प्रधानमन्त्री डा. बाबुराम भट्टराईया इनापय् माओवादीं तत्काल हे निम्ह दुजःतय्त सरकारय् छ्वयेगु क्वःछिउगु खः । मुँज्याय् न्वकू तकं जुयादीम्ह डा. भट्टराईं मन्त्रीपरिषद खालि तयेमजिउगु धयादिसें न्ह्याम्ह जूसां सरकारय् छ्वयेत इनाप यानादीगु खः ।
माओवादीया भागय् लाःपिं न्याम्ह मन्त्रीइ धाःसा वैद्य पक्षयाम्ह छ्वयेगु संस्थापन पक्षं तयारी यानाच्वंगु दु । थुगु खँय् सहमति याकेगु जिम्मा नायः पुष्पकमल दाहाल 'प्रचण्ड'यात बिउगु दु ।
