सहमतीय सरकारय् वैद्य पक्षं ब्वति मकाइगु
एकीकृत नेकपा (माओवादी)या न्वू मोहन वैद्य 'किरण' पक्षं राष्ट्रिय सहमतिया सरकार दयेकेगु न्यागू बुँदाया सहमति खारेज यायेत माग याःगु दु ।
वैद्य पक्षीय नेतातय्गु मुँज्यां वंगु कार्तिकय् जूगु न्हय्गू बुँदाया सहमति कथं हे न्यागू बुँदाया सहमति जूगु धासें खारेजया माग याःगु खः ।
मुँज्या लिपा न्वकू वैद्य व मू छ्यान्जे राम बहादुर थापा 'बादल'पाखें जारी याःगु विज्ञप्तीइ न्हय्गू बुँदाया सेना समायोजन सम्बन्धि विषयस थःपिनिगु असहमति दुगु व उगु न्हय्गू बुँदाया सहमतिया लिधंसाय् न्यागू बुँदाया सहमति जूगु धासें खारेजया माग याःगु खः ।
विज्ञप्तिइ देशभकत व क्रान्तिकारी शक्तियात अलग्ग तयाः गज्याःगु राष्ट्रिय सहमतिया सरकार दयेकेत्यंगु खः थःथवय् हे विरोधाभासपूर्ण व हास्यास्पद जूगु न्ह्यथनातःगु दु ।
वैद्य पक्षं पार्टी न्वकू तकं जुयादीम्ह डा. बाबुराम भट्टराईया नेतृत्वय् सरकार दयेकीगु सहमतीय सरकारय् थःपिं सहभागी मजुइगु नं क्वःछिउगु दु । डा. भट्टराई बहुमतीय प्रकृयापाखें निर्वाचित प्रधानमन्त्री जुयादीगुलिं राजीनामा बीमाःगु वैद्य पक्षया अडान खः । अथेहे न्यागू बुँदाया सहमति शान्ति प्रकृया व जनताया पक्षय् संविधान दयेकेगु प्रकृया लागि साधक मजूसे बाधक जुइगु धकाः नं वैद्य पक्षं ठहर याःगु दु ।
माओवादी, नेपाली कांग्रेस व एमाले नापं मधेसी मोर्चा दथुइ प्रधानमन्त्री डा. बाबुराम भट्टराईया नेतृत्वय् हे सहमतीय सरकार दयेकेगु लिसें न्यागू बुँदाया सहमति याःगु खः ।
