सुदूरपश्चिमया जनजीवन झन् झन् कष्टकर
अखण्ड सुदूरपश्चिम माग यासें आन्दोलन न्ह्याका वयाच्वंगु सुदूरपश्चिमेलीतय्सं याःगु बन्दया हुनिं शुक्रवाः च्यान्हुया दिनस नं सुदूरपश्चिमया जनजीवन अस्तव्यस्त जूगु दु । शुक्रवाः सुथंनिसें हे आन्दोलनकारीतय्सं चुक चुकय् विरोध प्रदर्शन यायेगु नापं विरोध र्याली तकं पिकाःगु दु ।
आन्दोलनया हुनिं बजाः, पसः, कारखाना, शिक्षण संस्था पूर्ण रुपं बन्द जूगु व ताःहाकःगु व चीहाकःगु दुरीया सवारी साधन तकं चले मजूगुलिं यात्रुत मर्काय् लाःगु खँ धाःगु दु ।
अथेहे बन्दया हुनिं कैलाली, कन्चनपुर, डोटी, डडेल्धुरा, अछाम, बझाङ्ग जिल्लाया जनजीवन तसकं हे कष्टकर जुजुं वनाच्वंगु दु । नापं आन्दोलनकारीतय्सं धनगढीया विमानस्थलय् तकं तालं ग्वया बिउगुलिं हवाइसेवा तकं पूवंक हे ठप्प जूगु दु ।
राज्य पुनर्संरचनाय् माओवादीं कैलाली व कन्चनपुर जिल्लायात थारुवान-लुम्बिनी प्रदेशय् लाकेगु प्रस्ताव यायेवं सुदूरपश्चिमेली जनतां अखण्ड सुदूरपश्चिमया माग यासें आन्दोलन याःगु खः ।
