सहमतीया सरकार नीस्वनेत दलत आन्तरिक सहलहलय् व्यस्त
एकीकृत नेकपा (माओवादी)या न्वकु डा. बाबुराम भट्टराई नेतृत्वया न्हूगु नीस्वनीगु सहमतीय सरकारय् ब्वति कायेगु निंतिं दलत थौं सुथंनिसें आन्तरिक सहलहलय् व्यस्त जूगु दु ।
कन्हय् तकया दुने भट्टराई नेतृत्वया सरकारय् ब्वति कायेत कांगेस व एमालें नं सहमति क्यनेवं दलत सरकारय् वनीपिं मनूतय्गु नां व मन्त्रालयया बिषयसं क्वःछिइत सहलह न्ह्याकूग खः ।
माओवादी नायः पुष्पकमल दाहाल 'प्रचण्ड' पक्षधर स्थायी समितिया थौं न्हिनय् च्वंगु बैठकं न्वकु नारायणकाजी श्रेष्ठ 'प्रकाश' व पोष्टबहादुर बोगटीयात छ्वयेगु निर्णय याःगु श्रोतं जानकारी ब्यूगु खः । माओवादी वरिष्ठ न्वकु मोहन वैद्य पक्षं बाबुराम नेतृत्वया सरकार नीस्वंवलय् मधेशी मोर्चालिसे जूगु विवादास्पद प्यंगू बुँदे सहमतिया जग दुनाः मवंनीगुलिं वर्तमान सरकारय् ब्वति मकायेगु जानकारी बीवं दाहाल भट्टराईं पुलांगुयात हे निरन्तरता बीगु तयारी याःगु दु ।
दाहाल भट्टराई पक्षं वैद्य पक्षलिसे सहलह यायेधुंकाः जक पार्टीपाखें मन्त्री जुइपिनिगु नां सार्वजनिक यायेगु जानकारी बिउगु दु ।
अथेहे नेपाली कांग्रेसया शीर्ष नेतात नं सुथंनिसें आन्तरिक सहलहसं न्ह्यज्याःगु दु । कांग्रेसय् शीर्ष नेतातय्गु दथुइ औपचारिक व अनौपचारिक रुपं सहलह न्ह्यानाच्वंगु दु । कांग्रेसयापाखें कृष्ण सिटौला, प्रकाशमान सिंह, विमलेन्द्र निधी व रामशरण महतया नेतृत्वय् सरकारय् ब्वति कायेगु विषयसं सहलह न्ह्यानाच्वंगु श्रोतं जानकारी ब्यूगु खः ।
अथेनं महामन्त्री कृष्ण सिटौलां हे कांग्रेसयापाखें सरकारय् नेतृत्व यायेगु थ्यंमथ्यं पक्का थें हे जुइधुंकूगु जानकारी बियादीगु दु । कांग्रेसय् आन्तरिक कचवंया विषयसं सहमति चूमलाःसा देउवा पक्षं सरकारय् ब्वति मकायेगु जानकारी ब्यूगु दु ।
मधेशी मोर्चाय् ब्वति दुगु दलत नं आन्तरिक सहलहसं न्ह्यज्याःगु दु । मधेशी जनअधिकार फोरम लोकतान्त्रिकया राजनीतिक समितिया बैठक नं थौं हे च्वंगु दु ।
