नैक्यालं लुइगु जात्रा क्वचाल

स्वनिगःया दक्कलय् ताःहाकःगु जात्रा बुंगद्यःया रथ जात्राया झ्वलय् थौं सनिलय् नैक्यालं लुइगु ज्या जुल ।

वंगु बैशाख १३ गते यलया पूच्वं रथ साला हयाः गाःबहाः याः न्यायेकूगु खःसा वयां लिपा नुगःयाः न्यायेकूसें थौं लगं याः कथं भुज्याः माने याःगु खः ।

सहकाल व वर्षाया द्यः कथं कयातःम्ह् बुंगद्यःया रथ जात्राया झ्वलय् कन्हय् याकः मिसाय भुज्याः याइगु परम्परा दु । याकः मिसाया भुज्याः धकाः कन्हय् सुथय् न्हापनं हे मिसातय्सं हे जक बुंगद्यःया रथ साली ।

बुंगद्यःयात छुं ई थति त्वालय् तयाः लिपा साइत स्वयाः जक जाह्वलाख्यलय् साला यंकी । अथे रथ जाह्वलाख्यलय् थ्यंकाः प्यन्हुया दिं कुन्हु भोटो क्यनकि रथ जात्रा क्वचाइ । द्यःयात खतय् तयाः बुंगय् यंकीगु खः ।