बेलायतपाखें दमकल नापं अग्नि नियन्त्रक ज्वलंया ग्वाहालि
येँ महानगरपालिकाया व्यवस्थापनय् लानाच्वंगु दमकलया अवस्था दयनीय जुयाच्वंगु इलय् बेलायती सरकारं येँ महानगरपालिकायात छगः दमकल व स्वंगू करोड तका बराबरया अग्नि नियन्त्रण उपकरण बिउगु दु ।
बेलायती सरकारं बिउगु उगु उपकरण व दमकल कायेत वंगु जनवरी महिनाय् महानगरपालिकाया कार्यकारी अधिकृत केदार बहादुर अधिकारी व बेलायती सरकार दथुइ सम्झौता पतिइ ल्हाःचिं तःगु खः ।
म्हिगः जक फुक्कं उपकरण व दमकल येँय् थ्यंकः हयेधुंकूगु दु । येँया दमकल प्रमुख लीलाराज गाछां स्वंगू करोड तका बराबरया अग्नि नियन्त्रक सामान प्राप्त जूगु जानकारी बियादिसें आः स्वनिगलय् गुगुं नं इलय् जुइफूगु मियात नियन्त्रण यायेत अःपुइगु जानकारी बियादीगु दु ।
