सरकार क्वथलेगु प्रस्ताव कांग्रेस सभासदतपाखें हे अस्वीकार
बाबुराम सरकार क्वथलेत अविश्वासया प्रस्ताव दर्ता यायेगु संसदीय दलया नेता रामचन्द्र पौडेलया प्रस्तावयात नेपाली कांग्रेसया बहुमत सभासदतय्सं अस्वीकार याःगु दु ।
नेता पौडेलं प्रधानमन्त्री विरुद्ध विशेष अधिवेशन सःतेत समावेदन बीगु व अविश्वासया प्रस्ताव दर्ता यायेगु तयारी कथं ल्हाःिचं मुंकेत संसदीय दलया मुँज्या सःतूगु खः ।
तर देउवा पक्षीय सभासदतय्सं धाःसा ग्वाहालि मयायेगु ख्याच्वः बिइवं सरकार क्वथलेगु योजनापाखें लिचिलादीगु खः ।
मुँज्याय् वरिष्ठ नेता शेर बहादुर देउवां पार्टीइ सहलह हे मजूगु धयादिसें अविश्वासया प्रस्तावय् समर्थन मयायेगु धयादीगु दु ।
सभासदतय्सं अविश्वासया प्रस्ताव दर्ता याःसा सहमतिया लकस स्यनीगु व कांग्रेसया प्राथमिकथा सरकार जक जूगु धइगु सन्देश जनताय् वनीगु धासें तसकं विरोध याःगु खः ।
अप्वः धइथें सभासदतय्सं कांग्रेसया प्रस्ताव सरकार स्वयां संविधान दयेकेगु धासें पौडेलयात छुं ई पीत इनाप याःगु दु । पौडेल धाःसा सरकार विरुद्ध अविश्वास प्रस्ताव दर्ता यायेगु व थः प्रधानमन्त्री जुइगु ग्वसाः दुगु खँ सीदुगु दु । उकिया लागि पौडेलं थ्यंमथ्यं निगू दर्जन सभासदतय्गु ल्हाःिचं तकं मुंकेधुंकूगु खः ।
थ्वहे झ्वलय् कांग्रेस संसदीय दलया मुँज्यां संविधान दयेकेगु प्रकृया चीहाकः यायेत अन्तरिम संविधानया धारा ७० संशोधनया लागि संसदया मुँज्या सःतेत माग याःगु दु ।
