मन्त्रालय् भागबन्डाया बारे कोइराला व नेपाल दथुइ खँल्हाबंला

न्हूगु सरकार गठन जूगु निवाः देयेधुंकाः नं मन्त्रिमण्डलं पूर्णता बीमफूगु ईलय् प्रधानमन्त्री माधवकुमार नेपाल व कांग्रेस सभापति गिरिजाप्रसाद कोइराला दथुइ खँल्हाबंला जूगु दु ।

आइतवाः सुथय् कोइराला निवास महाराजगंजय् थ्यंकाः दिम्ह प्रधानमन्त्री नेपालं मन्त्रिमण्डल बिस्तार व सरकार संचालनया निंतिं गठन यायेगु धाःगु उच्चस्तरीय संयन्त्रया बारे कोइराला नाप खँल्हाबंला यानादीगु खः ।

एमालेया शिर्ष नेतात नाप कोइराला निवस थ्यंकादिम्ह नेपालं फोरमया संस्थापन पक्षं सरकारयात ब्यूगु समर्थन लितः कायेधुंकाः ब्वलंगु लिपांगु घटनाक्रमया बारे नं च्यूताः प्वंकादीगु खः । अथेहे नेतात दथुइ विनाविभागिय मन्त्रीतय्त बीगु मन्त्रालय बारे नं खँल्हाबंला जूगु खः ।