बसं क्यलाः निम्ह सित

येँय्या चावहिली च्वंगु गोपीकृष्ण हल नापसं बसं क्यलाः निम्ह सीगु दु ।

प्रहरीया कथं बा. २. ख. ११२ नम्बरया बसं बा. ३३. प. ७०३७ नम्बरया मोटरसाइकलयात ठक्कर नकूबलय् मोटरसाइकल गयाः वयाच्वंपिं निम्हं सीगु खः । दुर्घटनाय् लानाः उदयपुरया नीनिदँया सन्तोष राई व बुढानिलकण्ठ-५ या झिंखुदँया सुशील श्रेष्ठ सीगु खः । राई घटनास्थलय् मदुगु खसाः श्रेष्ठ ओम अस्पताय् वासः याकाच्वंगु ईलय् मदुगु खँ प्रहरीं धाःगु दु ।

घटना लिपाः ठक्कर ब्यूगु बा. २. ख. ११२ नम्बरया बस चालक नरबहादुर खतिवदायात महानगरिय प्रहरी विभाग गौशालां नियन्त्रणय् काःगु दुसा: बस चालकया ग्वहालिमि धासाः बिस्यू वंगु दु ।

घटनालिपाः शनिवाः न्हिच्छि चावहिली तनावग्रस्त जूगु खसाः लिपा: तनाव अप्वंगुलिं अन सशस्त्र प्रहरी तकं प्ररिचालन याःगु खः ।