निक्वःगु 'बुद्धि पूर्ण सिरपाः' लःल्हात
निक्वःगु बुद्धि पूर्ण सिरपाः व सम्मान शनिवाः छगू ज्याझ्वःया दथुइ लःल्हात ।
येँया सिद्धार्थ बनस्थली स्कूलया हलय् जूगु उगु ज्याझ्वलय् बाखं च्वमि श्यामदास प्रजापतियात 'बुद्धि पूर्ण सिरपाः' व बाखं च्वमि नापं उपन्यासकार मथुरा साय्मियात 'बुद्धि पूर्ण सम्मान' लःल्हाःगु खः । बाखं च्वमि श्यामदास प्रजापति उसाँय् मदुगुलिं ज्याझ्वलय् उपस्थित जुयादीमफूगु खःसा सिरपाः म्ह्याय् मय्जु रश्मिला प्रजापितं प्रतिनीधित्व यासें सिरपाः लःल्हाना कयादीगु खः । उगु सिरपाःस नीन्याद्वः तका व दसिपौ दुथ्यानाच्वंगु दु । ज्याझ्वलय् मूपाहां नापं जुयादीम्ह इलामया बुद्धिजीवि व सह प्राध्यापक युद्ध प्रसाद वैद्यं उगु सिरपाः व सम्मान लःल्हानादीगु खः ।
शोभना राजवंशीया सभाध्यक्षताय् जूगु उगु ज्याझ्वलय् नेवाः देय् दबूया मध्यमांचल न्वकू विजय तण्डुकार, सम्मानित जुयादीम्ह मथुरा साय्मि, रश्मीला प्रजापति व बाखं च्वमि लक्ष्मण राजवंशी थः थःगु नुगः खँ प्वंकादीगु खः । आपालं भाषाह्यःमित नापं स्वनिगलं पिनेया थी थी जिल्लाया नेवाःतय्गु नं उपस्थिति दुगु खः ।
बाखंच्वमि लक्ष्मण राजवंशीं थः मा अबुया नामं थुगु सिरपाः नीस्वनादीगु खःसा न्हापांखुसी थुगु सिरपाः बाखं च्वमि केदार सितुयात बिउगु खःसा बाखं च्वमि प्रकाश प्रधानाङ्गयात सम्मान याःगु खः ।
