आःया अवस्थाय् संविधानया मस्यौदा तकं वये थाकुइगु : आचार्य
संवैधानिक समितिया सभापति निलाम्बर आचार्यं जेठ १४ गते दुने संविधान जारी यायेगु प्रतिबद्धता गुकथं पूवंकेफइ धकाः नेतातय्त न्ह्यसः तयादीगु दु ।
संवैधानिक समितिया शनिवाः च्वंगु मुँज्याय् नं दलतय्सं सहमतिया प्रस्ताव न्ह्यब्वये मफयेवं असन्तुष्ट जुयादीम्ह सभापति आचार्यं विवाद समाधान उपसमितिइ च्वंपिं शीर्ष नेतातय्त उकथं न्ह्यसः तयादीगु खः ।
सभापति आचार्यं जेठ १४ गते संविधान जारी यायेगु प्रतिबद्धता दलतय्गु शीर्ष नेतातपाखें वःसा नं आःया अवस्था व ज्या ल्यंदनीगु स्वयेबलय् संविधान मखु न्हापांगु मस्यौदा वयेत नं थाकुइगु दावी यानादिल ।
वय्कलं सहमतिया लागि आः ई तने मफइगु धयादिसें आइतवाः च्वनीगु मुँज्यां महत्वपूर्ण निर्णय याइगु धयादिल । यदि सहमति जुइमफत धाःसा लोकतान्त्रिक पद्धतियात स्वीकार यासें मतदानय् वनेमाःगु धयादिल ।
मुँज्याय् सभासदतयसं मू मू दलया शीर्ष नेतातय्सं तःक्वः मछि ई तनाः नं सहमति यायेमफूगु व शनिवाःया मुँज्याय् उपस्थित तकं मजूगुलिं कुंखिउगु दु । सभासदतय्सं कुंखिनेवं समितिया मुँज्या आइतवाः सुथसिया च्याताः ई तकया लागि स्थगित याःगु खः ।
