झिगू प्रदेशं कुहांमवने मखु : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' झिगू प्रदेश दयेकेगु थःपिनिगु प्रस्तावय् सहमति मजूसा १४ गू प्रदेशया अडानय् लिहांवनेगु ख्याच्वः बियादीगु दु ।
शेर्पा सभासदतलिसे शनिवाः नापलायेगु झ्वलय् माओवादी नायः प्रचण्डं सहमतिया लागि थःम्हं झिगू प्रदेशया प्रस्ताव याःसा नं नेपाली कांग्रेस व नेकपा (एमालें) खुगू न्हय्गू प्रदेशया अडान काःगु धासें असन्तुष्टि प्वंकादिल ।
नायः प्रचण्डं एमाले व कांग्रेसं थुकथं हे अडान कयाच्वन धाःसा थःपिं १४ गू प्रदेशय् लिहांवनेगु नापं मतदानय् वनेगु धयादिसें राज्य पुनर्संरचना यायेगु इलय् जातीय नापं भौगोलिक पहिचानयात छुं नं हालतय् मत्वःतेगु नं प्रतिबद्धता प्वंकादिल ।
प्रमूख दलया हिमाली क्षेत्रया नेता नापं सभासदतय्सं संविधानसभाया राज्य पुनर्संरचना समितिं प्रस्ताव याःगु १४गू प्रदेशया हे माग यासें माओवादी नायः प्रचण्ड, एमालेया नायः झलनाथ खनाललिसेंया शीर्ष नेतातय्त ज्ञापन पौ लःल्हासें शेर्पा व जडान प्रदेशयात कायम हे यानातय्त दबाव बिया वयाच्वंगु खः ।
थ्वहे झ्वलय् शेर्पा सभासदतय्गु मागयात कयाः एमाले नायः झलनाथ खनालं शीर्ष नेतातय्गु मुँज्याय् खँ तयेगु आश्वासन बियादीगु दु ।
