नेवाः साँस्कृतिक संग्रहालयया उलेज्या
नेपालभाषा केन्द्रीय विभागया ग्वसालय् शुक्रवाः छगू ज्याझ्वःया दथुइ नेवाः साँस्कृतिक संग्रहालय तयेगु लागि 'इरा गौरी कक्ष'या उलेज्या जुल ।
त्रिविया उपकुलपति प्रा. डा. हिराबहादुर महर्जनं उलेज्या यानादीगु उगु ज्याझ्वलय् कक्षया दातापिं इरा श्रेष्ठ व डा. गौरी श्रेष्ठं मूपाहां डा. महर्जनयात ताःचाः लःल्हानादीगु खः । डा. महर्जनं उगु ताःचाः नेपालभाषा केन्द्रीय विभागया नायः प्रा. प्रेमशान्ति तुलाधरयात लःल्हानादिल ।
ज्याझ्वलय् विभागपाखें दातापिं इरा श्रेष्ठ व डा. गौरी श्रेष्ठ, निर्माणया ज्या कःघानादीम्ह ई. श्रीकण्ठ लाकौल व मदुम्ह बैकुण्ठ लाकौलया जहान मय्जु तारा लाकौलपिन्त दोसल्लां न्ययेकाः हनापौ लिसें मतिनाया चिं लःल्हानाः हनेज्या याःगु खः ।
संग्रहालयया लागि माःगु नेवाः संस्कृतिया थी थी हलंज्वलंत मुंकेगु ज्या नं थ्वकुन्हु निसें न्ह्याकूगु दु । उगु इलय् अन उपस्थित नेवाःतय्सं संग्रहालयया लागि छगूत्या लख स्वयां अप्वः आर्थिक ग्वाहालिया लिसें ज्वलंत लःल्हाःगु खः ।
ज्याझ्वःया निगूगु ब्वय् थी थी सिरपाः व पदक आदि नं लःल्हायेगु ज्या जूगु खः । गुकी चैन लाकौल सिरपाः सिलुकुमारी महर्जनयात व पीयुष पदक धर्मकृष्ण श्रेष्ठयात लःल्हाःगु खः ।
अथेहे श्रेष्ठ पदक मोहनकृष्ण श्रेष्ठ व मा. जगतलाल लुमन्ति सिरपाः गंगा महर्जनयात लःल्हाःगु खः ।
थ्वहे झ्वलय् पतमतारा बज्राचार्य, विमल केशरी अमात्य, रश्मी महर्जन व सानुशोभा शाक्ययात पुष्पशोभा छात्रबृत्ति व त्रैलोक्यमान बनेपाली, सुनीता राजभण्डारी व तुलसीकृष्ण प्रजापतियात त्रिवि छात्रवृत्ति लःल्हायेगु ज्या जूगु खः ।
विभागीय प्रमुख प्रा. प्रेमशान्ति तुलाधरया सभापतित्वय् जूगु ज्याझ्वलय् दातापिनिपाखें ई. श्रीकण्ठ लाकौल व इरा श्रेष्ठ, ब्वमिपिनिपाखें लुमन्ति दबूया नायः सुनीता राजभण्डारी, मूपाहां त्रिवि उपकुलपति प्रा. डा. हिराबहादुर महर्जनपिन्सं नुगः खँ प्वंकादीगु खःसा प्रा. माणिकलाल श्रेष्ठं लसकुस यानादीगु खः ।
