जिल्लायात यथावत तयाः कांग्रेसपाखें न्हय्गू प्रदेशया प्रस्ताव
नेपाली कांग्रेसं आः दयाच्वंगु जिल्लायात यथावत तयाः न्हय्गू प्रदेशया प्रस्ताव याःगु दु ।
मू मू स्वंगू दल व मधेसी मोर्चाया शुक्रवाः च्वंगु मुँज्याय् नेपाली कांग्रेस नामाकरण मयासे प्रदेशया प्रस्ताव याःगु कांग्रेस नेता अर्जुननरसिंह केसीं जानकारी बियादीगु दु ।
जातीय, भूगोल, संस्कृति व भाषा सहितया प्रदेश दयेकेमाःगु खँय् बः बिउसें कांग्रेसं प्रदेशत दयेकेगु इलय् आः दयाच्वंगु जिल्लायात कुचा थलेमजिउगु प्रस्ताव तःगु दु । कांग्रेसं सीमान्त जिल्लाया हकय् छु प्रदेशय् च्वनेगु धइगु सम्बन्धित जिल्लायात हे बीगु प्रस्ताव तःगु दु ।
कांग्रेसं प्रदेश नामाकरण यायेगु खँय् निगू विकल्प न्ह्यब्वःगु दु । छगू जातीय, भूगोल, संस्कृति व भाषा सहितया जुइमाःगु मखुसा संविधानय् हे व्यवस्था यानाः नामाकरण यायेगु अधिकार सम्बन्धित प्रदेशयात बीगु उगु प्रस्तावय् दुथ्यानाच्वंगु दु ।
प्रदेश दयेकेगु आधार भौगोलिक सुगमता व जनसंख्याया समानुपातिक वितरण, मू जातीय घनत्व दुगु जिल्ला छगू हे प्रदेशय् तःया सामर्थ्य व पहिचानया सन्तुलन जुइमाःगु उगु प्रस्तावय् दु । आर्थिक निर्भरता भौगोलिक नापं वातावरणया सम्बन्धया आधारय् मधेश व भित्री मधेस दथुइ स्वापू दयेमाःगु नं कांग्रेसं न्ह्यथंगु दु ।
