'पहिचान सहितया संघीयता मवःसा देशय् मि च्याइ'

न्हूगु संविधान निर्माणया विवाद मिले यायेत प्रमुख दलत दथुइ निरन्तर वार्ता जुयाच्वंगु इलय् आदिवासी जनजाति नेतातय्सं पहिचान सहितया संघीयता मवःसा देशय् मि च्याइगु ख्याच्वः बिउगु दु ।

आदिवासी जनजाति संयुक्त संघर्ष समितिया ग्वासालय् येँया बसन्तपुली बिहीवाः जूगु बृहत्त खबरदारी सभाय् मधेशी जनअधिकार फोरम नेपालया अध्यक्ष उपेन्द्र यादवं संविधानसभाया उपहास यानाः दलतय्सं संविधन च्वयेगु ज्या यानाच्वंगु द्वपं बियादिल । वय्कलं पहिचान बिनया संविधान मवसाः आदिवासी जनजाति, मधेशी, मुस्लिम व दलित छप्पं जुयाः संघर्ष यायेमाःगु धयादिल ।

नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं पहिचान सहितया संघीयता मवःसा संविधान च्याकीगु जक मखु देशय् हे मि च्याइगु ख्याच्वः बियादिल ।

'पहिचान सहितया संघीयता मवःसा संविधान जक च्याकइ मखु, संविधान च्वइपिं सभासद्तय् पुतला जक च्याइ मखु देय् छगूलिं मि च्याइ' वय्कलं धयादिल, 'उगु मिं अज्याःपिं नेतातय्त गन थ्यंकी व धाये फइमखु ।'

नेपाल आदिवासी जनजाति महासंघया अध्यक्ष राजकुमार लेखीं पहिचान सहितया संघीयता मवःसा संविधान जारी जुइवं अन हे उगु संविधान च्याकीगु व अन लिपा देय्न्यंक मि च्याइगु धयादिल ।

पहिचान बिनाःया संघीय संविधानय् ल्हाःचिं तयाः वइपिं सभासद् संविधानसभा भवनं पिने पलाः तयाः क्यनेत ख्याच्वः बियादिसें नेवाः देय् दबूया नायः नरेश ताम्रकारं धयादिल, 'पहिचान बिनाःया संघीयता वःसा आः थीथी बाजं थाइपिं आदिवासी जनजातितय्सं बाजं थाइगु ल्हातं ल्वाभः ल्ह्वनी ।'

तराई मधेश लोकतान्त्रिक पार्टीया महासचिव गोविन्द चौधरीं संघीयता चाहे जूपिं व चाहेमजूपिं निगू पक्ष दथुइ आः संघर्ष जुयाच्वंगु धयादिल ।

सभाय् माओवादी सभासद् सुरेश आले मगर, कांग्रेस सभासद् इन्द्र बहादुर गुरुङ व एमाले सभासद पासाङ शेर्पां आः पहिचानया सवालय् पार्टीं बेइमानी याःसा थःपिंसं अज्याःगु पार्टीगत घेरा त्वाः थलेगु प्रतिबद्धता प्वंकादिल ।

सभाय् आदिवासी महिला महासंघया सोनी लामा, अखिल नेपाल आदिवासी संघया नगेन्द्र राई, जनमुक्ति पार्टीया अटर राई, नेपाल ताम्सालीङ दलया परशुराम तामाङं नं न्ववानादीगु खः ।