'मधेशी व जनजाति छप्पं जुयाः वनेमाः'
मधेशीवादी नेतातय्सं आः आदिवासी जनजाति व मधेशीत छप्पं जुयाः संघर्ष यायेमाःगु खँ धाःगु दु ।
आदिवासी जनजाति संयुक्त संघर्ष समितिं बिहीवाः येँ याःगु सभाय् वक्ता कथं झाःपिं मधेशी जनअधिकार फारेमया अध्यक्ष उपेन्द्र यादव व तराई मधेश लोकतान्त्रिक पार्टीया महासचिव गोविन्द चौधरीं आदिवासी जनजाति, मधेशी व दलिततसं मंकाः कथं पहिचान सहितया संघीयताया निंतिं आन्दोलन यायेमाःगु धयादिल ।
'जि आदिवासी जनजातितय् सभाय् वयाः छिकपिं फुक्कसित झी नापं जनाः संघर्ष यायेत इनाप यानाच्वनाः' यादवं धयादिल, 'झी नापं जनाः वंसां झीसं अधिकार फ्वनेगु मखु, खस-ब्रम्हुतय्सं झी नाप वयाः आधिकार काः वयेमाली ।'
चौधरीं ब्राम्हणवादीत तसकं चालख जूसां अधिकार प्राप्ति आन्दोलन यानाच्वंपिं नापं संघर्ष यानाः थःपिनिगु आन्दोलन प्राप्ति यायेमाःगु धयादिल ।
