नेवाः वाग्मती प्रदेशयात नेवाः नेपालमण्डल तयेत माग
दल दथुइ राज्य पुनर्संरचनाय् सहमति जुइ मफयाच्वंगु इलय् थीथी जातीय संगठनं जातीय म्हसिका नापंया संघीयता दयेमाःगु माग याना दबाव बियाच्वंगु दु ।
नेवा स्वायत्त राज्य मंका संघर्ष समितिं शुक्रवाः एकीकृत नेकपा (माओवादी)या नायः पुष्पकमल दाहालयात नापलाना जातीय म्हसिकाया लिधंसाय् संघीय राज्य निर्धारण यायेत दबाव बिउगु खः । नायः पुष्पकमल दाहालया छेँ नापलाना संघर्ष समितिया दुजःतय्सं बिहीवाः माओवादीं प्रस्ताव याःगु झिगू प्रदेशया नामाकरणय् असन्तुष्टि प्वंकूगु खः । इमिसं नेवाः वाग्मती प्रदेशयात नेवाः नेपाः मण्डल तयेत माग याःगु दु ।
संघर्ष समितिया छ्याता लिपा नायः पुष्पकमल दाहालं म्हसिकाया लिधंसाय् संघीयता दयेमाःगुलिइ माओवादी दृढ जूगु धयादिसें मेगु दलनाप सहलह जुयाच्वंगु धयादिल ।
नापलायेगु ज्याय् पद्मरत्न तुलाधर, मल्ल के सुन्दर, सत्यमोहन जोशी, दिलिप महर्जन, मंगलसिद्धि मानन्धर, राजेन्द्र श्रेष्ठ नापं नेवाः स्वायत्त राज्य मंकाः संघर्ष समितिया दुजःत दुथ्याः ।
News Location:
