कोचिला बन्दं जनजिवन प्रभावित

राष्ट्रपतिं ल्ह्वंगु पलाः असंवैधानिक जूगु व माओवादीं संसदय् दर्ता याकूगु संकल्प प्रस्ताव बारे सहलह मयाकूगु विरुद्ध शनिवाः याःगु कोचिला बन्दं जनजिवन प्रभावित जूगु दु ।

बन्दया झ्वलय् थाय् थासय् लँ अवरुद्ध यानातःगुलिं सर्वसाधरणत मारय् लाःगु दुसा: प्रदर्शनकारीतय्सं सुनसरीलय् खुगः मोटरसाइकल व मोरङय् पत्रिका ज्वनाः वःगु कान्तिपुरया बा. ६. च. ८६६६ नम्बरया छगः गाडीइ तोडफोड याःगु दु । अथेहे सुनसरीया झुम्काय् यात्रुत व प्रदर्शकारीत दथुइ ल्वापू जूगु खसाः लिपाः प्रहरीं घटनायात नियन्त्रयाय् काःगु खँ सुनसरी प्रहरीं धाःगु दु ।

बन्दया कारणं झापा, सुनसरी व मोरङया कलकारखाना, व्यापारिक व औद्योगिक प्रतिष्ठान दक्वं बन्द जुयाच्वंगु दु । आन छुं अप्रिय घटना मजुइमाः धकाः स्वंगुलिं जिल्लाय् ब्यापक रुपं सुरक्षाकर्मीत परिचालन यानातःगु दु ।