फोरम पाखें सरकार विरुद्ध प्रदर्शन
मधेशी जनअधिकार फोरमं सरकारं थःगु पार्टी विभाजन यायेत स्वःगु व पार्टीया सहमति विपरित पार्टीया दुजः विजयकुमार गच्छदारयात मन्त्री देयेकाः सपथ ग्रहण याकूगु धासें सरकार विरुद्ध प्रदर्शन याःगु दु ।
थौं सुथय् फोरमं सरकार विरुद्ध छगू जुलुस पिथंगु खसाः लिपाः माइतिघर मण्डलाय् थ्यंकाः प्रधानमन्त्री माधवकुमार नेपालया पुतला च्याकूगु खः । नापं फोरम कार्यकर्तातय्सं पार्टीया नियम उल्लंघन यासें अवसरवादी जुयाः सरकारय् वंगू धासें नेता गच्छदारया पुतला नं च्याकूगु खः ।
फोरम अध्यक्ष उपेन्द्र यादवं पार्टीया सहमति बिनाः थःगु पार्टीया हे नेतायात मन्त्रीमण्डलय् दुथ्याकाः अन्तरिम संविधान विपरित सपथ ग्रहण याकूगु धासें सरकारयात ब्यूगु समर्थन म्हिग हे लितः काःगु खः । म्हिग छगू पत्रकार सम्मेलन यानाः नेता गच्छदार नापं न्ह्यम्ह फोरम नेतातय्त पार्टीं कारवाही याःगु खः । सरकारयात ब्यूगु समर्थन लिपाः आः फोरमं प्रतिपक्षि जुया च्वनीगु घोषणा याःगु दु ।
