प्यंगू न्हूगु संग्रहालय निर्माण जुइगु
नेपालया राजनीतिक कालखण्ड व नेपा:या संस्कृति व परम्परा ब्वयेगु कथं प्यंगू त:धंगु संग्रहालय निर्माण यायेगु योजना दुगु खँ प्रधानमन्त्री माधवकुमार नेपालं धयादीगु दु । शनिवा: येँया भृकुटीमण्डपय् च्वंगु जनजाति संग्रहालयया अवलोकन यासें प्रधानमन्त्री नेपालं येँया भृकुटीमण्डप, गोकर्ण, नारायणहिटी दरबार व नवलपरासीलय् संग्रहालय निर्माण यायेगु थ:गु योजना दुगु धयादिल ।
भृकुटीमण्डप स्थित पर्यटन बोर्डय् देय्या दक्वं जात-जातिया पहिचान ब्वयेगु कथं आधुनिक सँग्रहालय देयेकीगु, गोकर्णय् लोकतान्त्रिक गणतन्त्र तक नेपाली जनतां या:गु आन्दोलनया संस्मरण ब्वयेगु कथं संग्रहालय निर्माण, नारायणहिटीइ राजतन्त्र कालया वस्तुस्थिति ब्वयेगु कथं संग्राहलय निर्माण यायेगु व नवलपरासीलय् थारु संस्कृति ब्वयेगु कथं सँग्रहालय निर्माण यायेगु तयारी सरकारं यानाच्वंगु जानकारी प्रधानमन्त्री नेपालं बियादिल । प्रधानमन्त्री नेपालं सँग्रहालय निर्माणया निंतिं अर्थमन्त्रालययात निर्देशन नं बीधुंकूगु जानकारी बियादिल ।
प्रधानमन्त्री नेपालं जनजाति संग्राहलयया अवलोकन लिपा शनिवा: लोकतान्त्रिक आन्दोलनय् शहीदया सम्मानय् निर्माण यायेत्यंगु गोकर्णस्थित शहीद पार्कया नं निरीक्षण यानादिल ।
