कम्यूनिष्ट पार्टी पलिस्था दिवसया झ्वलय् थी थी ज्याझ्वः
नेपालय् कम्यूनिष्ट पार्टी पलिस्था जूगु थिनं ख्वीस्वदँ दत । ख्वीस्वदँ न्ह्यः जहाँनिया राणा शासन विरुद्ध संघर्ष यायेत पुष्पलाल श्रेष्ठया नेतृत्वय् २००६ साल बैशाख १० गते थौंया दिनस नेपाल कम्यूनिष्ट पार्टीया स्थापना जूगु खः ।
तत्कालिन पार्टी स्थापना याःपिं संस्थापकिपं मध्ये थौंकन्हय् बामपन्थी नेता नरबहादुर कर्माचार्य छम्ह जक जीवित दनिसा पुष्पलाल श्रेष्ठ निरन्जन गोविन्द बैद्य नारायण विलास जोशी व मोतीदेवी श्रेष्ठिपं मदयेधुंकल । वय्कःपिन्सं उबले नेपालय् वाक स्वतन्त्रता मदुगु धासें भारतया कलकत्ताय् हे नेपाल कम्यूनिष्ट पार्टीया पलिस्था जूगु घोषणा यानाः राणा जहाँनिया शासन विरुद्ध संघर्ष न्ह्याकूगु खः ।
पार्टी स्थापना दिवसया लसताय् थौं कम्यूनिष्ट पार्टीतय्सं थी थी ज्याझ्वः यानाः हंगु दु । थ्वहे झ्वलय् थौ येँय् जूगु ज्याझ्वःयात सम्बोधन यानादिसें एकीकृत नेकपा माओवादीया नायः पुष्पकमल दाहाल प्रचण्डं पार्टीया असन्तुष्टि पक्षं विउगु तथाकथित द्वपंयात थःम्हेस्यां छुं नं वास्ता मयायेगु धयादीगु दु ।
ज्याझ्वलय् न्ववानादिसें नायः प्रचण्डं ठोस परिस्थितिया ठोस विश्लेषण यानाः क्रान्तियात मदिक्क न्ह्याकाच्वनागु दावी यानादिल । वय्कलं तथाकथित द्वपंयात वास्ता मयाःसां सकारात्मक सुझावयात धाःसा न्यनेत तयार दुगु नं स्पष्ट यानादिल ।
नायः प्रचण्डं माओवादी लडाकुत शाही सेनातलिसे मजूसे नेपाःया सेनालिसे समायोजन जूगुलिं ग्यायेम्वाःगु नं धयादिल ।
अथेहे कम्यूनिष्ट पार्टी पलिस्थाया झ्वलय् नेकपा एमाले उपत्यका विशेष समन्वय कमिटिपाखें येँय् विचा गोष्ठिया ग्वसाः ग्वल । ज्याझ्वलय् न्ववानादिसें वरिष्ठ नेता केपी शर्मा ओलीं माओवादी कम्यूनिष्ट पार्टी मजूगु टिप्पणी यानादिल । वय्कलं काटमार व हिंसा याइगु पार्टी कम्यूनिष्ट जुइमफइगु दावी तकं यानादिल ।
नेता ओलीं माओवादीं धाःथें वःगु जनयुद्ध सत्ता प्राप्तिया लागि संघर्ष व उत्पात जक याःगु दावी यानादिसें थःगु पार्टीं चुनाव त्याकाः लोकंह्वाःगु सरकार न्ह्याकेधुंकूगु अवस्थाय् माओवादीं हिंसात्मक नीति ज्वनाः गल्ती याःगु तकं द्वपं बियादिल ।
ज्याझ्वलय् एमाले सचिव युवराज ज्ञवालीं मार्क्सवादया आधारभूत सिद्धान्त त्वःतेगु नापं लोकतान्त्रिक मान्यता लोमंकेगु ज्या थःगु पार्टीं मयाइगु विश्वास प्वंकादिल ।
अथेहे कम्यूनिष्ट पार्टीया संस्थापक नेता नरबहादुर कर्माचार्यं कम्यूनिष्टत आन्दोलित जुयाः गणतन्त्र स्थापना जूसां नं अझं न्हूगु जनवादी व्यवस्था मवनीगु धयादिल ।
