आन्दोलनया बारे नेवाःतय् बृहत्त भेला
न्हूगु संविधानय् नेवाः स्वायत्त राज्य नापं पहिचानया लिधंसाय् संघीयताया व्यवस्था यायेत नेवाःतय्सं यायेत्यंगु आन्दोलनया विषयलय् कयाः छगू बृहत्त भेला जुल ।
नेवाः स्वायत्त राज्य मंकाः संघर्ष समितिया ग्वसालय् आइतवाः येँय् जूगु भेलाय् वइगु वैशाष १४ गते आदिवासी जनजाति संयुक्त संघर्ष समिति नापं येँया बसन्तपुली आमसभा यायेगु जानकारी बिउगु खः । नापं बैशाष ११ गते देय्न्यंक मासल जुलुस व कोणसभा व १३ गते येँया भृकुटी मण्डपं मोटरसाइकल र्याली यायेगु जानकारी बिउगु खः ।
संघर्ष समितिया नायः बाबुराजा बज्राचार्यया सभापतित्वय् जूगु ज्याझ्वलय् भूमीसुधर राज्य मन्त्री दिलिप महर्जनं संविधानसभाय् राज्य पुनर्संरचनाया बारे मतदान जूसाः आदिवासी जनजाति सभासदतय् भूमिका महत्वपूर्ण जुइगुलिं थीथी पार्टीइ आवद्ध जनजाति नेतातय्त खबरदार यायेमाःगु धयादिल । वय्कलं माओवादी पार्टी दुने निगू लाइन संघर्ष थें खनेदुसां राज्य पुनर्संरचनाया सवालय् पहिचान सहितया संघीयताया पक्षय् छथाय् हे दुगु धयादिल ।
माओवादी सभासद् हितमान शाक्यं आः छेँय् ज्या यायेत छखाः छेँय् छम्ह जक त्वःता मेपिं फुक्कं सतकय् कुहांवयेमाःगु ई वःगु धयादिल । वय्कलं जनजाति सभासद्तय्सं संसदं आन्दोलन यानाः जक मगाःगुलिं फुक्कसित सतकय् कुहांवयाः निरन्तर खबरदारी यायेत नं इनाप यानादिल ।
एमाले सभासद् मंगलसिद्धि मानन्धरं मनूतय्सं भूगोल, पहाड, हिमाल आदियात पहिचान बियातःगुलिं प्रमुख पहिचानया आधार धइगु मनूत वा जाति हे जूगुलिं पहिचानया व्याख्यया बारे झी सचेत जुइमाःगु धयादिल ।
मंकाः संघर्ष समितिया सचिवालय कजि मल्ल के. सुन्दरं राज्य पुनर्संरचनाया नापनापं निर्वाचण प्रणालीपाखे नं झीसं ध्यान बिइमाःगु न्ह्यःथनादिल । वय्कलं आः सहमति जुल धकाः पिहांवयाच्वंगु ७० प्रतिशत प्रत्यक्ष व ३० प्रतिशत समानुपातिकया प्रणालीं समावेशीता सुनिश्चित मजुइगुलिं थुकीयात नं छगू प्रमुख मुद्दा कथं झीसं ल्ह्वनेमाःगु धयादिल ।
अथेहे नेवाः देय् दबूया नायः नरेश ताम्राकारं आः नेवाःत दथुइ नं नेवाः राज्यया पक्ष दुपिं व मदुपिं म्हिसिकेमाःगु धयादिल ।
भेलाय् ख्वप, थिमि, यल, तिस्तुङ, किपु लगायत थासं वःपिं प्रतिनिधितय्सं वैशाष १४ गते जुइगु आमसभाय् थःपिंसं सक्रियातापूर्वक ब्वति कायेगु प्रतिबद्धता प्वंकूगु खः ।
