स्वंगू दलत व मधेसी मोर्चाया मुँज्या निष्कर्षविहिन
न्हूगु संविधानय् दयाच्वंगु विवादीत विषयस सहमति मालेत च्वंगु मू मू स्वंगू दल व संयुक्त लोकतान्त्रिक मधेसी मोर्चाया मुँज्या निष्कर्ष विहिन जुल ।
संविधानसभा भवन न्हू बानेश्वरय् शनिवाः च्वंगु मुँज्याय् न्याय प्रणाली व नागरिकताया विषयस सहलह जूसा नं छुं नं सहमति जुइमफुत । मुँज्याय् एकीकृत नेकपा (माओवादी) व मधेसी मोर्चां संवैधानिक अदालत दयेकेमाःगु अडान काःगु खःसा उकियात कयाः नेपाली कांग्रेस व नेकपा (एमालें) अस्वीकार याःगु खः । माओवादी व मधेसी मोर्चां निश्चित ई बियाः जूसां संवैधानिक अदालत दयेकेमाःगु अडान काःगु खः ।
राज्यया पुनर्संरचना यानाच्वंगु खःसा अदालतया नं पुनर्संरचना जुइमाःगु फोरम गणतान्त्रिकया कार्यवाहक नायः राजकिशोर यादवया धापू दु ।
माओवादी नायः पुष्पकमल दाहाल 'प्रचण्ड' संयाजेक दुगु विवाद समाधान उपसमितिइ संवैधानिक अदालत दयेकेगु सहमति जूगु खः । अथे खःसां लिपा कांग्रेसं संवैधानिक अदालत दयेकेगु इलय् न्यायालय दथुइ द्वन्द अप्वयावनीगु धासें सर्वोच्च अदालत अन्तरगत अलग हे बेन्च दयेकेमाःगु अडान काःगु खः ।
अथेहे सर्वोच्च अदालतया प्रधानन्यायाधीश लिसेंया न्यायाधीशत नं संवैधानिक अदालत दयेकेगु खँय् विरोध याना वयाच्वंगु खः ।
मुँज्याय् राज्यया शासकीय स्वरुप, राज्य पुनर्संरचना व निर्वाचन प्रणालीया विषयस सहलह हे मजूगु खँ धाःगु दु ।
