'होटल व रेष्टुरेण्टय् च्वनाः संविधान दयेकेगु दुर्भाग्यपूर्ण'
मधेसी जनअधिकार फोरम नेपालया नायः उपेन्द्र यादवं मधेसयात प्रादेशिक स्वायत्तता मबिउतले देशय् संघीयता व संविधान स्वीकार्य मजुइगु खँ धयादीगु दु ।
विराटनगरय् शनिवाः पत्रकारत नापलायेगु ज्याझ्वलय् न्ववानादिसें नायः यादवं स्वंगू तःतःधंगु दलतय्सं होटल व रेष्टुरेण्टय् च्वनाः संविधानया खाका दयेकेगु दुर्भाग्यपूर्ण जूगु धयादिल ।
वइगु जेठ १४ गते तक संविधान दयेकेगु अवस्था मदुगु थःम्हेसित जानकारी वःगु धयादिसें नायः यादवं छुं छुं राजनीतिक दलत व नेतातय्सं संविधान तयार जुइधुंकूगु धकाः हल्ला न्यंकाः जनतायात भ्रमय् लाकेत स्वःगु नं द्वपं बियादिल ।
