जेठ १४ गतेयात सुखद व ऐतिहासिक जुइ : खनाल
नेकपा (एमाले)या नायः झलनाथ खनालं संविधान दयेकेगु झ्वलय् खनेदयाच्वंगु विवादत याकनं हे ज्यंकाः जेठ १४ गतेयात सुखद व ऐतिहासिक दयेकेत स्वयाच्वनागु खँ धयादीगु दु ।
शान्ति व संविधानया लागि नायः खनालं न्ह्याका वयाच्वंगु टेलिफोन संवादया झ्वलय् शनिवाः कंचनपुरवासीत लिसे खँल्हानादिसें दलत दथुइ विवाद जुयाच्वंगु यक्व हे विषयस सहमति जुइधुंकूगुलिं क्वःछिनातःगु इलय् हे संविधान जारी जुइगु खँ धुक्क जुयादीत इनाप यानादिल ।
कैलालीइ लूगु ल्वाभःया प्रसंग ल्ह्वनादिसें नायः खनालं ल्वाभः पिनेतयाः न्ह्याकूगु शान्ति प्रकृयां जनताय् दयाच्वंगु दिगो शान्ति व संम्वृद्धिया अपेक्षाय् कुठराघात जुइगु न्ह्यथनादिल ।
टेलिफोन वार्ताय् नायः खनालं थीथी राजनीतिक दलया नेतात, संघ संस्थाया प्रतिनीधि नापं स्थानिय बुद्धिजीवित लिसें संवाद यानादीगु खः ।
