नक्कली चालक अनुमति पौ काःवपिन्त ज्वन
प्रकृया पूमवंकूसें सवारी चालक अनुमति पौ कायेत स्वःपिं गुइखुम्हेसित प्रहरीं शनिवाः बाँकेया नेपालगंजय् ज्वंगु दु । प्रकृया पूमवंकूसे सवारी चालक अनुमति पौ कायेत नेपालगंजया भेरी अञ्चल यातायात ज्याकुथिइ वःपिन्त प्रहरीं ज्वंगु खँ धाःगु दु ।
उमित प्रहरीं नेपालगञ्ज बसपार्कया जलजला व क्यापिटल होटलपाखें सरकारी प्रकृयाया नक्कली कागजात दयेकाच्वंगु अवस्थाय् प्रहरीं नियन्त्रणय् काःगु दु । अनुमति पौ कायेत वःपिं नवलपरासी, चितवन व बुटवलया जूगु खँ प्रहरीं न्ह्यथंगु दु ।
ज्वंपिं सकलसित नवलपरासीया नवलपुर ड्राइभिङ्ग सेन्टर, बुटवलया एस. के. ड्राइभिङ्ग सेन्टर व चितवनया हाम्रो ड्राइभिङ्ग इन्ष्टिच्यूट नापं नेपालगञ्ज यातायात ज्याकुथिया कर्मचारीया मिलोमतोय् आपालं धेबा कयाः लाइसेन्स दयेकेत स्वयाच्वंगु प्रहरीया अनुमान दु ।
