पहिचान लिसेंया संघीयता त्वःतूसा पार्टी न्हनावनीगु : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' पहिचान लिसेंया जातीय आधारय् संघीयता लागू जुयातुं त्वःतीगु स्पष्ट यानादीगु दु । माओवादीं पहिचान लिसेंया संघीयता त्वःतूसा पार्टी हे न्हनावनीगु धयादिसें नायः प्रचण्डं पहिचान लिसेंया जातीय आधारय् संघीयताया लागि थःगु पार्टी न्ह्याःवनीगु नं धयादिल ।
जातीयता लिसेंया संघीयताया लागि दबाव बीगु तातुनाः लिम्बुवान संघर्ष समितिं न्ह्यब्वःगु ज्ञापनपौ लःल्हाना कयादिसें नायः प्रचण्डं संविधानसभाया राज्य पुनर्संरचना समितिं दयेकूगु १४ गू प्रदेशयात गुगुं नं हालतय् मत्वःतेगु न्ह्यथनादीगु दु ।
नेकपा (एमाले)या नेता नापं लिम्बुवान संघर्ष समितिया संयोजक विजय सुब्बाया नेतृत्वय् लाजिम्पाटय् च्वंगु नायः प्रचण्डया छेँय् वंगु पुचलं संघीयताया निर्माण यायेबलय् जातीय पहिचान व आत्मनिर्णयया अधिकारयात सम्मान यायेत नायः प्रचण्डयात इनाप याःगु खः ।
