वरिष्ठ नेवाः पत्रकारत नाप सहलह
नेवाः राष्ट्रिय पत्रकार दबूया ग्वसालय् वरिष्ठ नेवाः पत्रकारनाप नेवाः पत्रकारतय्सं न्ह्याकेमाःगु पलाःया बारे छगू सहलह मुँज्या जुल ।
येँया ओम्बहाःस्थित ओलम्पस क्लबय् जूगु सहलह मुँज्याय् वरिष्ठ पत्रकार हिरण्यलाल श्रेष्ठं नेवाः पत्रकारिता ख्यःयात न्हूगु ढंगं न्ह्याकेमाःगु सुझाव बियादिल । वय्कलं नेवाः पत्रकारिता मिसन पत्रकारिता जूसां उकीयात पेशागत रुपं नं विकास यानाः यंकेमाःगु न्ह्यःथनादिसें आः पुलांगु हे पहः जक ज्वनाः मखसें न्हूगु बिचाः कथं पत्रकारिता यायेमाःगु धयादिल ।
अर्थ पिथना प्रकाशनया नायः रमेशकाजी स्थापितं नेवाः पत्रकारतय्त जुइगु समस्यायात चिउताः कयाः अज्याःपिं पत्रकारतय्त ग्वाहालि यायेफुसाः राष्ट्रिय पत्रकार दबू धिसिलाक न्ह्याःवनीगु धयादिल ।
सन्ध्या टाइम्स न्हिपौया सम्पादक सुरेश मानन्धरं नेवाः पत्रकारतय्सं स्वायत्त प्राप्तिया निंतिं थःगु कलम चले यायेगु ज्या नापनापं थःगु हे भासं वैकल्पिक मुलधारया पत्रकारिता यानाः खस भासं पिहांवयाच्वंगु पत्रिकातय्त काउन्टर बिइमाःगु धयादिल ।
पत्रकार दबूया नायः श्रीकृष्ण महर्जनया सभापतित्वय् जूगु ज्याझ्वलय् वरिष्ठ पत्रकारपिं धर्मरत्न शाक्य, रामकृष्ण कर्माचार्य, नरेशवीर शाक्य, राजु शाक्य, अमीर ताम्राकार, विजयरत्न असंवरे लगायतं नं थःगु नुगः खँ प्वंकेगु नापं पत्रकार दबूया सुझाव बियादीगु खः ।
दबूया दुजः नापं गोरखापत्र न्हिपौया फोटो पत्रकार नातिकाजि महर्जनं लसकुस यानादीगु ज्याझ्वलय् दबूया मू छ्याञ्जे उदेन न्हूसाय्मिं सहलह मुँज्याया उदेश्य ध्वाथुइकादीगु खः । दबूया न्वकू राज्यलक्ष्मी शाक्यं न्ह्याकादीगु मुँज्यायात ज्याझ्वःया कजि नृपेन्द्रलाल श्रेष्ठं सुभाय् बियादीगु खः ।
झिंस्वम्ह सल्लाहकार नियुक्त
वरिष्ठ पत्रकारत नाप जूगु सहलह मुँज्याया दथुइ हे नेवाः पत्रकार राष्ट्रिय दबूं थःगु संगठनया सल्लाहकार कथं झिंस्वम्ह वरिष्ठ पत्रकारतय्त नियुक्त यात ।
दबूया सल्लाहकारय् प्रा. माणिकलाल श्रेष्ठ, धर्मरत्न शाक्य, हिरण्यलाल श्रेष्ठ, रमेशकाजि स्थापित, रामर्कष्ण कर्माचार्य, पुष्करलाल श्रेष्ठ, अमिर।त्न ताम्राकार, नरेशवीर शाक्य, श्याम श्रेष्ठ, राजेन्द्र महर्जन, राजु शाक्य, सुरेश मानन्धर व विजयरत्न असंबरेयात नियुक्त याःगु खः ।
