पहिचान लिसेंया संघीयता वइ : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' पहिचानया आधारय् हे प्रदेश निर्माण जुइगु खँ धयादीगु दु । वय्कलं प्रदेशया ल्याः म्हो जूसां पहिचान लिसेंया संघीयता वइगु स्पष्ट यानादिल ।
दलतय्सं न्हय्गू प्रदेशय् सहमति याःगु धासें उकिया विरोधय् ज्ञापन पौ बिउवंपिं नेपाल आदिवासी जनजाति महासंघया प्रतिनिधि मण्डलयात लाजिम्पाटय् च्वंगु थःगु हे छेँय् नायः प्रचण्डं उकथंया प्रतिवद्धता प्वंकादीगु खः ।
वय्कलं थःगु पार्टी पहिचान लिसेंया संघीयताया पक्षय् दुगु स्पष्ट यानादिसें पहिचान बिनाया संघीयता जुइमफइगु धयादिल । थ्वहे झ्वलय् नायः प्रचण्डं धयादिल, 'चिन्ता कयादीम्वाः पहिचानया हे लिधंसाय् संघीयता वइ ।'
छुं न्हि न्ह्यः हात्तीवन रिसोर्टय् जूगु मुँज्याय् शीर्ष दलया नेतातय् दथुइ न्हय्गू प्रदेशय् सहमति जूगु बुखँ पत्रपत्रिकाय् पिहांवयेवं नेपाल आदिवासी जनजाति महासंघं दबावमूलक ज्याझ्वः न्ह्याकूगु खः ।
नायः प्रचण्डं पहिचान लिसेंया संघीयताया लागि थःपिं नं संघर्ष यानाच्वनागु न्ह्यथनादिसें छुं भूगोलया लिधंसाय् व छुं आःया हे विकास क्षेत्रयात संघीयता घोषणा यायेमाः धयाच्वंगु न्ह्यथनादिसें खबरदारी थाति तयेत आदिवासी जनजाति महासंघयात इनाप नं यानादिल ।
