कांग्रेस व एमालें मंकाः धारणा दयेकेमफुत
संविधान च्वयेगु झ्वलय् विवाद जुयाच्वंगु विषयस मंकाः धारणा दयेकेत च्वंगु नेपाली कांग्रेस व नेकपा (एमाले)या मुँज्या बिना निष्कर्ष क्वचाल ।
सिंहदरवारय् जूगु उगु सहलहस राज्यया शासकीय स्वरुपया खँय् खँल्हाबँल्हा जूसा नं छुं नं सहमति धाःसा मजुल । एमालेया नेता भीम रावलया कथं निगुलिं पार्टीं थःथःपिनिगु खँ तयेगु ज्या जूसा नं निष्कर्षय् धाःसा थ्यने मफूगु खः ।
संविधानया अप्वः धइथें विषयस छगू हे धारणा दयाच्वंगु कांग्रेस व एमालेया दथुइ शासकीय स्वरुपया विषयस धाःसा फरक फरक मत दयाच्वंगु खः । कांग्रेस संसदपाखें निर्वाचित प्रधानमन्त्री व सेरेमोनियल राष्ट्रपतिया पक्षय् दुसा एमालें प्रत्यक्ष निर्वाचित कार्यकारीया प्रस्ताव यानाच्वंगु खः ।
एमालें संसदीय प्रणालीइ माओवादीयात सहमत याकेत वा प्रत्यक्ष निर्वाचित प्रधानमन्त्रीया प्रस्तावय् सहमत जुइत कांग्रेसयात इनाप याना वयाच्वंगु दु ।
