घा:पा: जूम्ह पत्रकार श्रेष्ठयात नेवा: पत्रकारतय्सं नापलात
आन्दोलनया समाचार संकलनया झ्वलय् घा:पा: जूम्ह सक्रिय नेवा: पत्रकार सुविन श्रेष्ठयात बिहिवा: नेवा: पत्रकार राष्ट्रिय दबूया पदाधिकारी नापं केन्द्रीय दुज:तय्गु छगू पुचलं नापलाना: वय्क:या स्वास्थ स्थितियात कया: जानकारी कायेगु नापं स्वास्थ्य लाभया कामना यायेगु ज्या या:गु दु ।
थीथी संचार माध्यमय् आवद्ध जुया: स्वतन्त्र पत्रकारिता याना: वयाच्वंम्ह श्रेष्ठ थौंकन्हय् च्वना: वयाच्वंगु यलया ज्याउला ख्यलय् च्वंगु छेँय् हे वना: नेवा: पत्रकारतय्सं नापलायेगु ज्या यानादीगु ख: । नेवा: पत्रकार राष्ट्रिय दबूया नाय: श्रीकृष्ण महर्जन, न्वकुपिं राज्यलक्ष्मी शाक्य व सुनिल महर्जन, छ्याञ्जे सुरजवीर शाक्य, केन्द्रीय दुज:पिं रचना श्रेष्ठ, मञ्जु बज्रचार्य, जुनीबज्र बज्राचार्य व राजेन्द्र श्रेष्ठपिंसं घा:पा: जूम्ह पत्रकार श्रेष्ठयात नापलानादीगु ख: ।
वंगु चैत्र २९ गते संयुक्त राष्ट्रिय जनआन्दोलन समितिं या:गु मसाल जुलुसया समाचार संकलन या:वंगु इलय् मि वय्कःया देपाया मिखाय् दुहां वना: घा:पा: जूगु ख: । आ: वय्क:या स्वास्थ्य स्थिति बांला:गु दु धका: नेवा: पत्रकार राष्ट्रिय दबुलिं धा:गु दु ।
