इलय् हे संविधान जारी जुइ : महामन्त्री सिंह
नेपाली कांग्रेसया महामन्त्री प्रकाशमान सिंहं संविधानय् दुगु विवादित विषयत छुं न्हि दुने हे ज्यनीगु दावी यानादीगु दु ।
वय्कलं संविधान दयेकेगु झ्वलय् दलत दथुइ दुगु विवाद क्वचायेकाः क्वःछिनातःगु इलय् न्हूगु संविधान जारी जुइगु धयादिल ।
दलतय्गु दथुइ शान्ति प्रकृयाय् जूगु लिपांगु सहमति व छुं न्हि न्ह्यः हात्तीवन मुँज्यापाखें अप्वःथें विवाद जुयाच्वंगु विषययात कयाः दलत सहमति लिक्क थ्यंगुिलं संविधान क्वःछिनातःगु इलय् हे जारी जुइगु वय्कलं धयादीगु दु ।
नेपाल विद्यार्थी संघया पीक्वःगु पलिस्था दिवसया लसताय् बुधवाः येँय् ग्वसाः ग्वःगु ज्याझ्वःयात सम्बोधन यानादिसें महामन्त्री सिंहं शान्ति प्रकृयाय् छुं सुधार खनेदुगु नापं राजनैतिक दलतनापया सहलह सकारात्मक जूगु धयादीगु दु ।
वय्कलं नेपाल विद्यार्थी संघ दुनेया विवाद ज्यंकेत थः न्ह्याः वनाच्वनागु धयादिसें सहमतिइ हे विवाद क्वचायेकाः थ्व स्वयाः न्ह्यः क्वःछिनातःगु इलय् हे महाधिवेशन याकेगु तकं स्पष्ट यानादिल ।
महामन्त्री सिंहं निरंकुशताया विरुद्ध संघर्ष यायेगु लागि नेविसंघया जन्म जूगु धयादिसें सकल विद्यार्थी व जनतायात अधिकार संरक्षण यायेगु पाखे संघयात कि्रयाशील जुइत तकं इनाप यानादिल ।
