जनजातितपाखें प्रमुख स्वंगू दलया ज्याकूथी धर्ना
प्रमुख स्वंगू राजनीतिक दल व मधेशी मोर्चा दथुइ हात्तीवन रिसोर्टय् न्हय्गू प्रदेश दयेकेगु खँय् अनौपचारिक सहमति जूगु बुखँ सार्वजनिक जुइवं आदिवासी जनजाति आक्रोशित जूगु दु । जातिय पहिचानया लिधंसाय् राज्य पुनर्संरचना निर्माण जुइमाःगु माग यानाच्वपिं जनजातितय्सं न्हय्गू प्रदेशया विरोध यासें बुधवाः प्रमुख स्वंगू राजनीतिक दलया ज्याकूथी धर्ना बिल ।
येँया कोटेश्वरय् च्वंगु माओवादीया ज्याकू, यलया सानेपाय् च्वंगु कांग्रेस व येँया बल्खुस्थित एमालेया ज्याकू पिने छगू-छगू घण्टा धर्ना बिउगु खः । नापं जनजातितय्सं स्वंगू दलया प्रमुखतय्त जातिय पहिचन सहित राज्य पुनर्संरचना यायेमाःगु व संविधानसभाया राज्य पुनर्संरचना व राज्य शक्तिया बाँडफाट समिति न्ह्यःब्वःगु १४ प्रदेश हे लागू यायेमाःगु माग सहितया ज्ञापनपौ नं लःल्हात ।
राजनीतिक दलतय्सं पहिचान विरोधी संघीयताय् सहमति यायेत्यंगु बुखँत सार्वजनिक जुइवं भावी रणनीति दयेकेत नेवाः नापं थीथी जानजाति संगठन दथुइ मंगलवाः व बुधवाः सहलह जुल । थ्वहे दथुइ नेपाल आदिवासी जनजाति महासंघं नं आन्दोलनया घोषणा याःगु दु ।
