'जातिय पहिचान सहितया संघीयता मवसाः विद्रोह'
संस्कृति मन्त्री गोपाल किरातीं जातीय पहिचान सहितया स्वायत्त राज्य विरुद्ध सहमति याःसां इमिसं थुगु धर्तिइ पलाः तयेगु थाय् तकं मदइगु खँ धयादीगु दु ।
रिपोटर्स क्लबय् मंगलवाः जूगु छगू साक्षात्कार ज्याझ्वलय् मन्त्री किरातीं थःगु हे पार्टीया नायः पुष्पकमल दाहाल 'प्रचण्ड', काग्रेस सभापति सुशिल कोइराला व एमाले अध्यक्ष झलनाथ खनालं जातिय पहिचान सहितया संघीयताया विरूद्ध सहमति याःसा वय्कःपिंसं नं थन तुतिं चुइगु तकं थाय् मदइगु ख्याच्वः बियादिल ।
मन्त्री किरातीं जातिय पहिचान सहितया राज्य सुनिश्चित यायेत थःम्ह बलिदान यायेत नं तयार दुगु खँ न्ह्यःथंनादिसें अज्याःगु संघीयता मवसाः जेठ १४ लिपाः देशय् विद्रोह जुइगु धयादिल ।
वय्कलं सविधानसभाया राज्य पुनर्संरचना तथा राज्यशक्तिया बाँडफाट समितिं दयेकःगु प्रतिवेदनया आधार कथं हे देय्या संघीयता जुइमाःगु खँय् बः बियादिल ।
उगु ज्याझ्वलय् मधेशी जनअधिकार फोरम नेपालया नायः उपेन्द्र यादवं मधेस स्वायत्त प्रदेस विपरीत संघीयताय् सहमति याःसा मधेशी मोर्चा मधेशं पतन जुइगु धयादिल । जातीय पहिचानया आधारं संघीयता जुइमाःगु व प्रदेशत स्वायत्त व अधिकार सम्पन्न जुइमाःगु खँ नं वय्कलं बः बियादिल ।
