कोदुवालय् विशेष पूजा यानाः बुंगद्यः लाइगु
यलया कोदुवालय् बुंगद्यःया द्यःलायेगु जात्रा जुइगु जूगु दु । थ्वहे वइगु बैशाख १० गते सुथय् कोदुवालया खुसिइ विशेष पूजा यानाः बुंगद्यःयात लायेगु ज्या जुइ । बुंगद्यःयात स्वानय् जुकाः उगु स्वांयात विशेष कथं वहःया कलशय् तयाः जात्रा यायेगु परम्परा दु ।
द्यः तयातःगु कलश पूजालिसें यलया तःबहालय् हयाः अन दुगु बुंगद्यःया मूर्ति दुने प्वाथय् दुगु लुँयागु कलशय् जल तइ । व धुंकाः स्वनिगःया हे ताःहाकःगु बुंगद्यःया रथजात्रा न्ह्याइ ।
कोदुवालय् मेलाय् ब्वति कायेत यल लिसें जःखःया थासं भक्तजनिपं न्हापांगु दिन कोदुवाल वयाः चच्छि जाग्राम च्वनाः म्ये हालेगु प्याखं हुलेगु याइ । कोदुवाल यल जिल्लाया देवीचौर गाविसय् दुसा जाह्वलाख्यलं १३ किलोमिटर दक्षिण बुंगया भेगय् लाः ।
उगु मेला अनया दनुवार समुदायं दकले तःधंगु जात्राया कथं न्यायेका वयाच्वंगु दु ।
थुगुसी वइगु शनिवाः जात्रा न्यायेकेत भक्तजनिपं कोदुवाल वनी ।
थ्वहे झ्वलय् बुंगद्यःया रथ जात्राय् ब्वति कायेत थौं सुथय् येँया टौदहस च्वंम्ह कर्कोटक नागराज व क्वँय्ना गणेद्यःयात ब्वनेगु ज्या जुल ।
बुंगःया सुवाःतय्सं थौं सुथय् क्वँय्ना गणेद्यःया थाय् जात्रा स्वः बिज्याहुँ धकाः च्वयातःगु दिपौ देगलय् तिकाः थकूगु खःसा वहे ब्यहोरा च्वयातःगु दिपौ टौदहस चुइका थकूगु खः ।
