विस्केट जात्राया झ्वलय् निम्ह घाःपाः
ख्वपय् न्ह्यानाच्वंगु विस्केट जात्राया लिपांगु न्हि मंगलवाः ख्वपया गाहितिपाखें नासमनातक खः सालेगु झ्वलय् निम्ह घाःपाः जूगु दु । भैलद्यःया खः सालेगु झ्वलय् खतं छम्ह प्रहरी व खतं सिं कुतुंवयाः छम्ह घाःपाः जूगु खः ।
भैलद्यःया खतं क्यलाः महानगरीय प्रहरी परिसरया प्रहरी जवान नरहरि पौडेल घाःपाः जूगु खःसा खतं कुतुंवःगु सिं लानाः ख्वप ताथलिया संजिव न्हेमाफुकी घाःपाः जूगु खः । प्रहरी जवान पौडेलयात जँय् क्यःगु खःसा आः निम्हेसितं भक्तपुर अस्पतालय् वासः याकातःगु दु ।
प्रहरी महानगरीय प्रहरी परिसरया कथं प्रहरी जवानया अवस्था सामान्य दुसां न्हेमाफुकीया अवस्था धाःसा भचा गम्भीर जुयाच्वंगु दु ।
विस्केट जात्राया न्हापांगु दिनस नं खः सालेगु झ्वलय् छम्ह क्यलाः सीगु खःसा निम्ह घाःपाः जूगु खः ।
