'फुक्कं विवादित विषयलय् सहमति जुइन'
संविधान निर्माणय् खनेदुगु विवादित विषयलय् प्रमुख प्यंगू राजनीतिक शक्तित सहमति नापं थ्यंगु दावी नेतातय्सं याःगु दु ।
येँया पश्चिम-दक्षिण क्षेत्रय् लाःगु हात्तिवन हिमालय हाईट रिसोटय् आइतवाः निसें न्ह्याःगु वार्ता बुधवाः हानं च्वनेगु कथं सोमवाः क्वचाःगु दु । वार्ता लिपा पत्रकारत लिसे खँल्हाबंला यासें नेतातय्सं दलत दथुइ फुक्कं विवादित विषयलय् खँल्हाबंला जूगु व सहमति याये न्ह्यः मेमेगू पक्ष नाप वार्ता यायेगु निंतिं सोमवाः छुं नं सहमति मयानाःगु प्रतिक्रिया बिउगु दु ।
'शासकीय स्वरुप, राज्य पुनर्संरचना, निर्वाचन पद्धति, न्याय प्रणाली व नागरिताया विषयलय् खँल्हाबंला जुल' मुँज्या लिपा एमाले नायः झलनाथ खनालं धयादिल ।
एनेकपा (माओवादी), नेपाली कांग्रेस, नेकपा (एमाले) व मधेशी मोर्चाया शीर्ष नेतात दथुइया वार्ता सकारात्मक जूगु धासें नेतातय्सं थ्वहे वाःया दुने फुक्कं विषयलय् सहमति जुइगु दावी याःगु दु ।
'शासकीय स्वरुप लगायत फुक्कं विषयलय् मिश्रित प्रणाली कथं सहमति जुइत्यंगु दु ।' वार्ता लिपा उपप्रधानमन्त्री विजयकुमार गच्छदारं धयादिल, 'राज्य पुनर्संरचना पहिचान व सामर्थ्यया आधारय् यायेगु सैद्धान्तिक सहमति जूगु दु ।'
राजनीतिक दलत दथुइ विवादित विषयलय् सहमति मजूसा थ्वहे वैशाष ६ व ७ गते च्वनीगु संविधानसभाया मुँज्याय् बहुमतया आधारय् निर्णय याइगु जूगु दु ।
