हात्तिवनय् जनजातितय् धर्ना
राज्य पुनर्संरचना लगायत विवादित विषयलय् सहमति यायेत प्यंगू प्रमुख राजनीतिक शक्तितय् मुँज्या च्वनाच्वंगु हात्तिवन रिसोर्ट पिने हे आदिवासी जनजातितय्सं धर्ना बिउगु दु ।
आइतवाः निसें रिसोर्टय् च्वनाः वार्ता यानाच्वंगु प्यंगू शक्तिया प्रमुखतय्सं आदिवासी जनजातितय् भावना अःख राज्य पुनर्संरचनाय् सहमति यायेफुगु धासें जनजाति नेता व कार्यकर्तातय्सं अन हे वनाः धर्ना च्वंगु खः ।
नेपाल आदिवासी जनजाति महासंघया अगुवाई सलंस मोटरसाइकलय् वंपिं जनजातितय्त प्रहरीं येँया बल्खुइ हे पंगु खः । लिपा बिस्तारं त्वःतेवं प्रदर्शनकारीत हात्तिवन रिसोर्ट पिने थ्यंगु खः ।
जनजातितय्सं जातिय पहिचान सहित राज्यया पुनर्संरचना यायेमाःगु, संविधानसभाया राज्य पुनर्संरचना व राज्य शक्तिया बाँडफाँट समितिं न्ह्यब्वःगु १४ प्रदेशया खाकाय् सहमति यायेमाःगु नापं धर्मनिरपेक्षता लगायतया माग यासें धर्ना बिउगु खः ।
