हल्लां न्हू सतकय् भूत वल !
सोमवाः न्हिनय् येँया न्हू सतक तसकं अस्तव्यस्त जुल । व्यापारीक लागाः कथं नां जाःगु न्हू सतकय् सोमवाः छुं नं व्यापारीक कारणं सतक अस्तव्यस्त मजूसें छगू रोचक प्रसंगं अस्तव्यस्त जुल । प्रसंग खः छखाः छेँय् भूत वःगु हल्लां !
उगु हे हल्लां भूत स्वयेत धकाः सोमवाः न्हिच्छि हे उगु लागाय् आपालं मनूत मुनेगु ज्या जुल । अन सुनां भूतं छम्ह पत्रकारयात झ्यालं कुर्का हाःगु खँ न्यंकाच्वंगु खनेतसाः सुनां भूतं अनया मनूतय्त दाल धइगु हुइनाबुइना तच्वयेकाः यंकेवं अन मनूत भूत स्वयेत वःगु खः ।
तर न्हिच्छि धाइथें मनूत अन भूत स्वयेत च्वंसां सुनां नं भूत धाःसा मखन । न त भूतं सुयात झ्याल कुर्कूगु व दाःम्ह मनू सु खः धइगु नं धाये मफुत ।
खास जूगु छु जुयाच्वन धाःसां न्हू सतकं रञ्जना गल्ली वनेगु छखाः छेँय् न्हापां निसें हे भूत दुगु धायेगु यानातःगु खः । उकीं उगु छेँया च्वय् च्वंगु निगू तल्लाय् तकं सुं नं मच्वं । भूत दु धइगु शंकां हे सोमवाः उगु छेँया थुवालं एभिन्यूज टेलिभिजनया वास्तुशास्त्रीयात छेँया वास्तुशास्त्र स्वयेत सःतुगु जुयाच्वन ।
वास्तुशास्त्री नापं एभिन्यूज टेलिभिजनया पत्रकारत नं रिपोर्ट दयेकेगु निंतिं अन वंगु जुयाच्वन । उगु हे रिपोर्ट दयेकेगु झ्वलय् छक्वलं मनूतय्सं भूत वःगु धासें हल्ला यायेगु शुरु यात । लिपा एभिन्यूज टेलिभिजनं अन छुं नं कथं भूत मदुगु व भूतया हल्ला जक जूगु दावी यात ।
छेँया वास्तुशास्त्र स्वम्ह वास्तुशास्त्रीं नं छेँया न्ह्यःने हे ट्रन्समिटर दुगु व छेँया नापंसं टार दुगुलिं उकीया प्रभावं यानाः उगु छेँया मनूतय् स्वास्थ्यय् नकारात्मक लिच्वः लाःगुयात हे भूत धकाः हल्ला याःगु दावी यात ।
थुकथं भूतया हल्लां उगु क्षेत्र न्हिच्छि हे अस्तव्यस्त जक मखु अन भूत वःगु धइगु ग्याचिकुं आपालं पसःत नं बन्द यात ।
