राष्ट्रिय सरकार दयेकेत कांग्रेस व एमालेया जोड
प्रमुख प्रतिपक्षी दलत नेपाली कांग्रेस व नेकपा (एमालें) प्रधानमन्त्री डा. बाबुराम भट्टराई नेतृत्वया सरकारय् सहभागी मजुइगु धाःगु दु ।
येँय् आइतवाः जूगु छगू ज्याझ्वलय् कांग्रेस नेता डा. रामशरण महतं वर्तमान सरकारय् छुं नं हालतं सहभागी मजुइगु धयादिल । वय्कलं भ्रष्टाचाराया रेकर्ड दयेकूगु आःया सरकारय् सहभागी जुयाः जोकर मजुइगु धयादिसें न्हूगु सहमतिया सरकार दयेकेत राजीनामा बियादीत प्रधानमन्त्रीयात सुझाव बीत तकं लिचिलामदी । माओवादी व एमालें निक्वः निक्वः तक सरकारया नेतृत्व यायेधुंकूगुलिं आः दयेकीगु सरकारया नेतृत्व नेपाली कांग्रेसं याये दयेमाःगु तकं दावी यानादिल ।
एमालेया नेता प्रदीप ज्ञवालीं सरकार दयेकूगु इलय् जूगु प्यंगू बुँदाया सहमति खारेज मजूतले वर्तमान सरकारय् छुं नं हालतं सहभागी मजुइगु धयादिसें प्यंगू बुँदाया सहमति राष्ट्रघाती जूगुलिं थुगु सहमति खारेज जूसा वर्तमान सरकारय् सहभागी जुइत आपत्ति मदुगु नं स्पष्ट यानादिल । संविधान जारी यायेगु इलय् सकसिगु स्वामित्वया महसूस जुइकथं राष्ट्रिय सहमतिया सरकार दयेकेमाःगु व उकिया नेतृत्व कांग्रेसं यायेमाःगु नेता ज्ञवालीया धापू खः ।
अथेहे ज्याझ्वलय् प्रधानमन्त्रीया प्रमुख राजनीतिक सल्लाहकार देवेन्द्र पौडेलं संविधान दयेकेगु ज्याय् न्ह्याः वनेमाःगु इलय् सरकार परिवर्तन याःसा देश गम्भीर दुर्घटनाय् लायेफूगु ख्याच्वः बियादिल । वय्कलं थ्वहे सरकारय् कांग्रेस व एमाले सहभागी जुयाः संविधान जारी यायेमाःगु धयादिसें दलत दथुइ सहमति जूसा प्रधानमन्त्री डा. बाबुराम भट्टराई पंगः मजुइगु नं स्पष्ट यानादिल ।
