समायोजन जुइपिं लडाकुत छनौट लिपा जक नेतृत्व क्वःछिइगु
सेनाय् समायोजन जुइपिं माओवादी लडाकुतय् छनौट जुइधुंकाः जक महानिर्देशनालयया अन्तिम संरचना व नेतृत्वया बारे क्वःछिइगु सहमति दलत दथुइ जूगु दु ।
सेना समायोजनया निंतिं सेना अन्तर्गतया महानिर्देशनालय दयेकेगु बारे न्हापा हे दलत दथुइ सहमति जूगु खःसां उकीया अन्तिम संरचना गज्याःगु जुइगु व उकीया नेतृत्व सुनां याइगु धाइगु बारे दलत दथुइ विवाद जुयाच्वंगु खः ।
शनिवाः प्रधानमन्त्री निवास बालुवाटारय् च्वंगु प्रमुख दलया शीर्ष नेतातय् मुँज्यां समायोजन सम्बन्धी न्हय्गू बुँदे सहमति याःगु खः । समायोजन सम्बन्धी विवादित बुँदात ज्यंकेत नीस्वंगु कार्यदलं न्ह्यःब्वःगु न्हय्गू बुँदायात हे शीर्ष नेतातय्सं अन्तिम रुप बिउगु खः ।
सहमति कथं समायोजन जुइपिं माओवादी लडाकुतय् अधिकृत पद व मेमेगू दर्जा निर्धारण यायेत छनौट समिति नीस्वनीगु जूगु दु । अधिकृत पदया निंतिं लोकसेवा आयोगया अध्यक्षया नेतृत्वय् न्याम्ह दुजः दुगु छनौट समिति व मेमेगू दर्जाया निंतिं सैनिक सेवाया द्वितीय श्रेणीया अधिकृतया अध्यक्षताय् प्यम्ह दुजः दुगु छनौट समिति नीस्वनीगु सहमति जूगु दु ।
अथेहे समायोजन जुइपिंत तालिम कथं अधिकृत आधार तालिम ९ महिना, सैन्य आधार तालिम ७ महिना व हरेक दर्जाया मनूतय्त ३/३ महिनाया दर्जा विशेष तालिम बिइगु नं सहमति जूगु दु ।
