राष्ट्रपतिया अभिव्यक्ति प्रति जनजाति महासंघया आपत्ति
राष्ट्रपति डा. रामवरण यादवं देय् टुक्रे जुइगु कथंया संविधानय् थःम्ह ल्हाःचिं मतेगु धकाः बियादीगु अभिव्यक्ति प्रति नेपाल आदिवासी जनजाति महासंघं आपत्ति प्वंकूगु दु ।
जनजाति महासंघया अध्यक्ष राजकुमार लेखीं शनिवाः छगू विज्ञप्ति पिथनादिसें देय् टुक्रे जुइगु छुं हे सम्भावना मदुसां राष्ट्रपति यादवं म्वाःमदयेकं अज्याःगु हल्ला यानाजूगु धासें अज्याःगु अभिव्यक्ति अप्रत्यक्ष रुपं संघीयता विरुद्ध जूगु खँ न्ह्यथंगु दु ।
संविधानसभां पहिचान सहितया संघीयता लागू यायेगु न्हि नापं वयाच्वंगु इलय् तःधंगु छुं छुं पार्टीया हे नेतातय्सं राष्ट्रपतियात अज्याःगु अभिव्यक्ति बिइत सल्लाह बियाच्वंगु द्वपं नं लेखीं बिउगु दु ।
राष्ट्रपति यादव संवैधानिक राष्ट्रपति जक जूगुलिं थःगु दायरा स्वयां पिहांवयाः बिउगु अभिव्यक्ति लितकया उगु धापू प्रति क्षमायाचना यायेत नं विज्ञप्तिइ न्ह्यथनातःगु दु ।
