विक्रम संवत् २०६९या न्हूदँ
थौं बैशाख १ गते अर्थात विक्रम सम्वतया न्हूदँ २०६९ या लसताय् भिंतुना कालबिल यानाः हनाच्वंगु दु । न्हूदँया लसताय् राष्ट्रपति डा. रामबरण यादव, उपराष्ट्रपति परमानन्द झा, प्रधानमन्त्री डा. बाबुराम भट्टराई लगायत थीथी राजनीतिक दलया नेतातय्सं भिंतुना बियादीगु दु ।
न्हूदँया लसताय् भिंतुना देछायादिसें थीथी राजनीतिक दलया नेतातय्सं थःथवय् सहमति व सहकार्यसं बः बियादिसें इलय् हे न्हूगु संविधान निर्माण जुइमाः धकाः भिंतुना देछायादीगु खः ।
राष्ट्रपति डा. रामवरण यादवं न्हूदँया लसताय् भिंतुना देछायादिसें थःथवय् बन्धुत्व व सद्धाव अभिवृद्धिइ योगदान यायेफयेमाः धकाः मनंतुनादीगु दु । वय्कलं जनआन्दोलनपाखें प्राप्त उपलब्धीया रक्षा व इलय् हे संविधान निर्माणय् बः बियादिल ।
अथेहे प्रधानमन्त्री डा. बाबुराम भट्टराईं भिंतुना देछायादिसें सम्वृद्ध न्हूगु नेपाः निर्माणय् न्ह्यःज्यायेत फुक्कसित प्रेरणा दयेमाः धकाः मनंतुनादीगु दु ।
अथेहे एकीकृत नेकपा (माओवादी)या नायः पुष्पकमल दाहाल 'प्रचण्डं' भिंतुना सन्देश बियादिसें खुदँनिसेंया शान्ति प्रक्रिया लगभग पूवंगु व २०६९ सालय् नागरिकया चाहना कथंया संविधान निर्माणय् न्ह्यःज्यायेमाःगु न्ह्यथनादीगु दु ।
थौं न्हूदँया लसताय् नेपाल सरकारं सार्वजनिक बिदा बियातःगु दु ।
